आपसातल्या वादात वसईच्या उमेळमान गावात रक्तपात; तरुणाच्या अंगावर मित्रानेच केले सपासप वार

धारधार शस्त्राने गळयावर व पोटावर सपासप वार करीत त्यास रक्ताच्या थारोळ्यात सोडले

आशिष राणे, लोकमत न्यूज नेटवर्क

वसई:वसई विरार शहरात सध्या गोळीबाराच्या घटना ताज्या असताना आता माणिकपूर पोलीस ठाण्याच्या हद्दीतील उमेळमान गावात दोघा मित्रांमध्ये रक्तपाताची घटना मंगळवारी रात्री ९ च्या सुमारास घडल्याची माहिती माणिकपूर पोलिसांकडून मिळाली आहे. या घटनेत आरोपी राम यादव याने रागाच्या भरात सुरज जयस्वाल याच्यावर धारधार शस्त्राने गळयावर व पोटावर सपासप वार करीत त्यास रक्ताच्या थारोळ्यात सोडून गेला.

दरम्यान या थरारक घटनेत पीडित सुरज जयस्वाल हा गंभीर रित्या जखमी झाला असून त्याला नजीकच्या गोल्डन पार्क रुग्णालयात दाखल करण्यात आले आहे. तर त्याची प्रकृती चिंताजनक असून लागलीच त्याच्यावर शस्त्रक्रिया हि केली जाणार आहे. मिळालेल्या प्राथमिक माहितीनुसार,सुरज व राम हे दोघेही मित्र असून त्याच्यात पूर्वी हि पैशाच्या देवाणघेवाणी मधून वाद सुरु होताच  तर याआधीही हा वाद माणिकपूर पोलिसा समोर गेला होता मात्र मंगळवारी रात्री ८.३० च्या सुमारास दोघा मित्रा मध्ये पुन्हा एकदा वाद झाला असता या वादात राम ने सुरजच्या वडिलांना दूरध्वनी वरून आप के लडके का मै गला काटुंगा अशी धमकी दिली होती.

त्यामुळे वेळीच खबरदारी म्हणून हे सुरज चे कुटूंब पुन्हा माणिकपूर पोलिसात गेलं असता त्याच संधीचा फायदा घेत आरोपी राम ने सुरज याच्यावर सपासप वार करून त्यास गंभीर जखमी केलं. धक्कादायक म्हणजे राम यादव ने वार केल्यावर बराच वेळ सुरज एकाकी खितपत पडला होता मात्र त्याची स्थानिक गावकऱ्यांनी अजिबात विचारपूस ही केली नाही अखेरीस त्याच्या काही  मित्रांनी त्याची मदत करत तात्काळ त्याला गोल्डन पार्क रुग्णालयात दाखल केले.

विशेष म्हणजे आरोपीने गुन्हा केल्यावर थेट माणिकपूर पोलीस ठाण्यात जाऊन आपल्या गुन्ह्याची शरणागती पत्करली असून घडला प्रकार पोलिसांना कथनही केला आहे. तर रात्री उशिरापर्यंत गुन्हा नोंद करून आरोपीच्या अटकेची प्रक्रिया सुरु होती तर वारंवार घडणाऱ्या अशा घटनांनी मात्र वसई विरार शहरवासीय हादरून गेले आहेत.