अल्पवयीन तरुणीची हत्या करून मृतदेह नायगावच्या झाडाझुडपात फेकला

वालीव पोलिसांनी केला हत्येचा गुन्हा दाखल

मंगेश कराळे

नालासोपारा - अंधेरी येथे राहणाऱ्या १५ वर्षीय शाळकरी मुलीची हत्या करून तिचा मृतदेह नायगांव रेल्वे स्टेशनजवळील परिसरातील झाडाझुडुपांमध्ये पिशवीत गुंडाळलेल्या अवस्थेत सापडल्याने परिसरात खळबळ माजली आहे. सदर महिती मिळताच घटनास्थळी वालीव पोलीस पोहचून मृतदेह ताब्यात घेऊन पंचनामा करत शवविच्छेदनसाठी मृतदेह पाठविण्यात आला आहे. पोलिसांनी हत्येचा गुन्हा दाखल केला असून तपासाला सुरुवात केली आहे. 

नायगांवच्या परेरा नगर परिसरात शुक्रवारी दुपारी पिशवीत गुंडाळलेला १५ वर्षीय अल्पवयीन मुलीची हत्या केलेला मृतदेह सापडला आहे. तिची हत्या पोटात चाकू घोपसून केल्याचे निष्पन्न झाले आहे. वालीव आणि गुन्हे शाखेच्या पोलीसांच्या टीम आरोपीच्या शोधात आहे. नेमकी तिची हत्या कोणी व का केली याचा पोलीस शोध घेत तपास करत आहे. 

सदर हत्येप्रकरणी गुन्हा दाखल केला असून आरोपींचा शोध घेत पुढील तपास वरिष्ठांच्या मार्गदर्शनाखाली सुरू आहे. सदर मुलगी ही १५ वर्षाची अल्पवयीन आहे. - राहुलकुमार पाटील, पोलीस निरीक्षक, गुन्हे, वालीव पोलीस ठाणे