डॉक्टर गर्लफ्रेंडची हत्या करून स्वत:ही जीव देण्याचा बॉयफ्रेंडने केला प्रयत्न

पोलीस कार्यवाहीनंतर महिलेचा मृतदेह तिच्या नातेवाईकांकडे सुपूर्द केला. या प्रकरणात कलम ३०२ अंतर्गत गुन्हा दाखल केला आहे.

जम्मू - राज्यात श्रद्धा हत्याकांडासारखी खळबळजनक घटना समोर आली आहे. शहरातील जानीपूर परिसरात बुधवारी रात्री जौहर महमूदने गर्लफ्रेंड डॉक्टर सुमेधाची हत्या चाकूने वार करत केली आहे. जौहरने केलेल्या हल्ल्यात सुमेधाचा जागीच मृत्यू झाला आहे. गर्लफ्रेंडला ठार केल्यानंतर बॉयफ्रेंड जौहरनेही स्वत:वर वार करत जीव देण्याचा प्रयत्न केला. स्वत:च्या पोटावर केलेल्या हल्ल्यामुळे जौहर गंभीर जखमी झाला असून त्याच्यावर सध्या रुग्णालयात उपचार सुरू आहेत. 

पोलीस अधिकारी विजय कुमार यांनी सांगितले की, जौहर महमूदची प्रकृती चिंताजनक असून त्याचा जबाब नोंदवणे बाकी आहे. जबाब नोंदवल्यानंतर त्याने सुमेधाची हत्या का केली हे स्पष्ट होईल. २६ वर्षीय डॉक्टर सुमेधा ही तालाब तिल्लो गोल पुली इथं राहणारी होती. तर आरोपी जौहर हा भद्रवाह येथे राहायला होता. या दोघांमध्ये प्रेमसंबंध होते. मात्र काही कारणास्तव दोघांमध्ये वाद झाले. याच वादातून जौहरने चाकू मारून सुमेधाची हत्या केली. त्यानंतर त्याच चाकूने स्वत:चा जीव देण्याचा प्रयत्न झाला. 

पोलीस कार्यवाहीनंतर महिलेचा मृतदेह तिच्या नातेवाईकांकडे सुपूर्द केला. या प्रकरणात कलम ३०२ अंतर्गत गुन्हा दाखल केला आहे. पोलीस या घटनेची चौकशी करत आहेत. या घटनेपूर्वी आरोपी जौहरने त्याच्या फेसबुकवर पोस्ट केली होती. काही खासगी कारणास्तव स्वत:चे जीवन संपवत असल्याचं तो म्हणाला होता. याप्रकरणी डीएसपी विक्रम सिंह, एसएचओ विजय कुमार, एक उपनिरिक्षक यांच्या नेतृत्वात एक तपास पथक नेमले आहे. डीएसपी या प्रकरणाचा अहवाल आयओ यांना देतील. 

मिळालेल्या माहितीनुसार, आरोपी आणि मृत युवतीमध्ये संबंध होते. त्या दोघांनी जम्मूच्या डेंटल कॉलेजमधून बॅचलर ऑफ डेंटल सर्जरीचं शिक्षण पूर्ण केले होते. सुमेधा त्यानंतर एमडीएस शिक्षणासाठी जम्मूच्या बाहेर गेली. ७ मार्चला होळीसाठी सुमेधा घरी आली होती. तेव्हा ती बॉयफ्रेंडला भेटायला गेली. त्याठिकाणी काही कारणांवरून दोघांमध्ये भांडण झाले. त्यानंतर आरोपीने तिला चाकूने मारून टाकले. अद्याप या प्रकरणावर पोलिसांकडून तपास सुरू आहे.