बोंबला! लाईट गेले म्हणून मधुचंद्राच्या रात्री गच्चीवर जाऊन झोपला नवरदेव, संधी मिळताच नवरी फरार...

UP News : दागिन्यांसह, रोकड आणि मोबाईल घेऊन नववधू झाली पसार.

उत्तर प्रदेशच्या शाहजहांपूरमध्ये आपल्या मधुचंद्राच्याच रात्री नववधू वराला फसवून पळून गेल्याचा प्रकार घडला आहे. महिलेनं आपल्यासोबत सोन्याचांदीचे दागिने, ११ हजार रोख रक्कम आणि मोबाइलही पळवून नेला आहे. दरम्यान, अद्याप पीडित कुटुंबीयांकडून कोणतीही तक्रार दाखल करण्यात आली नसल्याचं पोलिसांचं म्हणणं आहे.

हे प्रकरण कटरा पोलीस ठाण्याच्या पालिया दरोबस्त येथील आहे. या गावातील रहिवासी रमेश पाल सिंह यांचा मुलगा रिंकू सिंगचा विवाह कुशीनगर जिल्ह्यातील पटावा पोलीस स्थानत परिसरातील काजलसोबत निश्चित झाला होता. २७ मे रोजी सर्वजण वरात घेऊन तेथे गेले आणि २८ मे रोजी वधूला त्यांच्या गावी आणण्यात आलं. दिवसभर थकलेले सगळे लोक झोपून गेले. यानंतर त्याच रात्री अकराच्या सुमारास वीज गेली. जास्त उष्णतेमुळे वर रिंकू गच्चीवर झोपला.

अंधाराचा फायदा घेत वधूने ११ हजारांची रोकड, मोबाईल व सोन्या-चांदीच्या दागिन्यांसह इतर साहित्य घेऊन पळ काढल्याचा आरोप वराच्या नातेवाईकांनी केला आहे. मध्यरात्री दोनच्या सुमारास वीज आल्यावर रिंकू खोलीत पोहोचला. मात्र पत्नी तेथे दिसली नाही. घराचे मुख्य गेटही उघडे होते.

त्यानं पत्नीच्या नंबरवर फोन केला असता मोबाईल बंद असल्याचा सांगत होते. सासरच्या मंडळींशी संपर्क साधला, मात्र त्यांच्याकडून समाधानकारक उत्तर मिळाले नाही. दोन दिवस सर्व प्रयत्न करूनही वधू परतली नाही. दरम्यान, हे प्रकरण प्रेम प्रकरणाशी निगडीत असल्याचं वाटत असल्याचं वराच्या कुटुंबीयांचं म्हणणं आहे. दागिन्यांसह वधू बेपत्ता झाल्याची माहिती पोलीस ठाण्यात देण्यात आल्याचं कुटुंबीयांनी सांगितलं. परंतु या प्रकरणी कोणतीही तक्रार मिळाली नसल्याचं पोलिसांनी म्हटलं.