परमबीर सिंह यांची उचलबांगडी झाल्यानेच तक्रार देण्याची बिल्डरची झाली हिंमत

माणसाकडून आपल्याला व कुटुंबीयांना धोका आहे, त्यामुळे पोलीस संरक्षण देण्याची मागणी या बिल्डरने केली आहे

जमीर काझी

मुंबई : आयपीएस अधिकारी परमबीर सिंह हे खूप ताकदवान असल्याने  जेलमध्ये सडत बसावे लागण्याच्या  भीतीपोटी कोट्यवधीची खंडणी वसुली होऊनही गप्प राहिलो होतो, मुंबईच्या आयुक्तपदावरून बदली झाल्याने  पोलीस यंत्रणा आपली फिर्याद घेईल, अशी खात्री पटल्याने त्यांच्याविरुद्ध तक्रार देण्याचे धाडस केल्याची कबुली तक्रारदार बिल्डरने दिली आहे. 

त्यांच्या माणसाकडून आपल्याला व कुटुंबीयांना धोका आहे, त्यामुळे पोलीस संरक्षण देण्याची मागणी या बिल्डरने केली आहे. भाईंदर येथील बांधकाम व्यावसायिक व ठाण्यातील यूएलसी घोटाळ्यातील आरोपी असलेल्या श्यामसुंदर अग्रवाल याने मरिन ड्राइव्ह पोलीस ठाण्यात परमबीर सिंह व इतरांविरुद्ध खंडणी वसुलीबद्दल गुन्हा दाखल केला आहे. त्यामध्ये त्याचा तत्कालीन व्यावसायिक भागीदार संजय पुनामिया यांचे सिंह यांच्याशी असलेले जवळचे संबंध, त्यांनी केलेली वसुली आणि परमबीर सिंह यांना मिळणाऱ्या पोस्टिंगबद्दल माहिती दिली आहे. परमबीर हे पुनामिया याच्या सांगण्यावरून आपल्याला खोटे गुन्हे दाखल करून ४, ५ वर्षे जेलमध्ये अडकवतील अशी भीती वाटत होती, त्यामुळे माझी, पुतण्यांची मोठ्या प्रमाणात लूट होऊन, ८ कोटींचा भूखंड १ कोटीला हडप करूनही आम्ही गप्प होतो. मात्र राज्य सरकारने मार्च महिन्यात त्यांची आयुक्तपदावरून बदली केली, त्यामुळे मुंबई पोलीस तक्रार नोंदवून घेतील, असा विश्वास वाटल्याचे अग्रवाल याने अधिकाऱ्यांना सांगितले. त्याच्या जबाबाच्या अनुषंगाने  कागदपत्रे, पुरावे तसेच २३ व ३० मार्च २०२१ रोजी अधिकाऱ्यांसमवेत झालेल्या बैठकींचे संभाषण रेकॉर्ड तपास अधिकाऱ्यांनी ताब्यात घेतले.

पुनामियाला राजकीय वरदहस्त
पोलिसांनी अटक केलेल्या बिल्डर व परमबीर सिंह यांचा निकटवर्तीय संजय पुनामिया याचे राजकीय नेत्यांशी घनिष्ठ संबंध आहेत. त्याची नातेवाईक  आमदार असून ठाणे जिल्ह्यातील वजनदार मंत्र्यांचा त्याला वरदहस्त आहे. त्यामुळेच यूएलसी घोटाळ्याबद्दल ठाण्याची क्राइम ब्रँच करीत असलेला फेरतपास अडीच महिन्यांपासून सुरू असूनही आणि सबळ पुरावे असतानाही आतापर्यंत त्याला अटक झाली नसल्याचे सांगितले जाते.