धक्कादायक! बॉयफ्रेंडच्या सांगण्यावरून मुलींच्या हॉस्टेलच्या बाथरुममध्ये लावला कॅमेरा; चंदीगडमधील घटना

चंदीगडमधून पुन्हा एकदा एक लाजिरवाणी घटना समोर आली आहे. मुलींच्या वसतिगृहात छुप्या कॅमेऱ्याने अश्लील व्हिडिओ बनवल्याचा प्रकार उघडकीस आला आहे.

पंजाबमधील चंदीगडमधून एक धक्कादायक घटना समोर आली आहे. या अगोदरही असेच एक प्रकरण समोर आले होते, चंदीगड विद्यापीठातील एका मुलीने विद्यार्थिनींच्या बाथरुममध्ये छुपा कॅमेरा लावल्याचे समोर आले. वसतिगृहातील बाथरुममध्ये कॅमेरा लावून अश्लिल व्हिडीओ शुटींग केल्याचे समोर आले आहे. हॉस्टेलमध्ये राहणारी एक तरुणी तिच्या प्रियकराला कॅमेऱ्यात रेकॉर्ड केलेले अश्लील व्हिडिओ पाठवत होती. पोलिसांनी आरोपी तरुणी आणि तिच्या प्रियकराला अटक केली आहे.

शेअर मार्केटच्या नावाखाली फसवणूक करणाऱ्याला पुण्यातून अटक, शेकडो नागरिकांना घातला गंडा!

मिळालेली माहिती अशी, चंदीगडमधील सेक्टर २२ मध्ये असलेल्या पीजीच्या बाथरूममध्ये कॅमेरा लावून सोबत असलेल्या मुलींचे अश्लील फोटो आणि व्हिडीओ बनवल्याचे प्रकरण समोर आले आहे. मुलींचे अश्लील व्हिडिओ बनवून प्रियकराला पाठवता यावेत यासाठी मुलीने बाथरूममध्ये गिझरच्या वर कॅमेरा बसवला होता. पोलिसांनी दोघांनाही अटक केली आहे. मुलीने प्रियकराच्या सांगण्यावरून बाथरूममध्ये कॅमेरा बसवल्याचे प्राथमिक चौकशीत समोर आले आहे. वसतिगृहातील तरुणी अंघोळ करत असताना गिझरवर कॅमेरा दिसल्याने ही बाब उघडकीस आली. मुलीने वसतिगृह चालकाला माहिती दिली. प्रकरणाचे गांभीर्य पाहून ऑपरेटरने पोलिसांना कळवले आणि संपूर्ण प्रकरण उघड झाले.

प्रकरण उघडकीस आल्यानंतर पोलिसांनी दोघांचे मोबाईल सील करून सीएफएसएल लॅबमध्ये पाठवले. लॅबच्या अहवालावरून स्पष्ट होईल की आरोपींनी सहकारी मुलींचे किती व्हिडिओ बनवले आहेत आणि ते पुढे कोणाकडे पाठवले आहेत? त्याचा तपास पोलीस करत आहेत. 

दोन्ही आरोपींची चौकशी करण्यासोबतच त्यांच्याविरुद्ध कायदेशीर कारवाई सुरू करण्यात आली आहे. न्यायालयात हजर केल्यानंतर दोघांनाही कोठडी सुनावण्यात येणार आहे. दुसरीकडे, हा खुलासा झाल्यानंतर वसतिगृहात राहणाऱ्या विद्यार्थिनींमध्ये भीतीचे वातावरण आहे. पोलिसांनी आरोपीविरुद्ध आयपीसी कलम 354 सी, 509 आणि 66 आयटी अॅक्ट अंतर्गत गुन्हा दाखल केला आहे.