कुऱ्हाडीनं गळा कापला अन् शीर हातात घेऊन गावभर फिरला; क्रूर दृश्य पाहून संपूर्ण जिल्हा हादरला

खून करून गुन्हेगार तोंडात गुटखा चघळत होता तसेच जोरजोरात हसत होता असं गावकऱ्यांनी सांगितले.

ठळक मुद्दे हे खतरनाक दृश्य पाहून गावातील प्रत्येकाच्या मनात दहशत निर्माण झाली.हा व्हिडीओ सोशल मीडियावर मोठ्या प्रमाणात व्हायरल होत आहे.घटनेचा व्हिडीओ सोशल मीडियात व्हायरल झाल्यानंतर पोलीस प्रशासन खडबडून जागे झाले

छत्तीसगडच्या गरियाबंद येथे क्रूर हत्येचा भयानक प्रकार समोर आला आहे. याठिकाणी एका आरोपानं कुऱ्हाडीने शेजारी राहणाऱ्या व्यक्तीवर वार केले. इतकेच नाही तर शीर धडापासून वेगळं करून टाकलं. त्यानंतरही या आरोपीचा राग शांत झाला नाही. त्याने मृत व्यक्तीचं धडापासून वेगळं झालेलं शीर आणि रक्ताने माखलेली कुऱ्हाड घेऊन संपूर्ण गावभर फिरत राहिला. हे दृश्य पाहून गावकऱ्यांमध्ये प्रचंड भीतीचं वातावरण तयार झालं.

गावातील ज्या ज्या लोकांनी हे दृश्य पाहिलं ते थरथर कापत होते. स्थानिक लोकांच्या माहितीनुसार, यावेळी खून करून गुन्हेगार तोंडात गुटखा चघळत होता तसेच जोरजोरात हसत होता. हे दृश्य उपस्थित असणाऱ्या एकाने मोबाईल कॅमेऱ्यात कैद केले. त्यानंतर हा व्हिडीओ सोशल मीडियावर मोठ्या प्रमाणात व्हायरल होत आहे. हे खतरनाक दृश्य पाहून गावातील प्रत्येकाच्या मनात दहशत निर्माण झाली.

या घटनेचा व्हिडीओ सोशल मीडियात व्हायरल झाल्यानंतर पोलीस प्रशासन खडबडून जागे झाले. स्थानिकांच्या माहितीनंतर पोलिसांनी आरोपीला बेड्या ठोकल्या. ही घटना गरियाबंदच्या छुरा पोलीस ठाणे हद्दीतील कोठी गावातील आहे. एका क्षुल्लक कारणावरून आरोपीने शेजारी राहणाऱ्या इसमाची हत्या केली. पोलीस सध्या या घटनेचा तपास करत आहेत. मृतकाच्या शेतात आरोपीचा पाळीव डुक्कर घुसून भाज्यांचे नुकसान करत होता. मृत व्यक्तीने अनेकदा याबाबत आरोपीसमोर नाराजी व्यक्त केली.

या दोघांमधील वाद वाढला त्यानंतर आरोपीने रागाच्या भरात कुऱ्हाडीनं जल्लादाप्रमाणे त्या वृद्ध व्यक्तीचा गळा कापून त्याची हत्या केली. त्यानंतर आरोपी मृत व्यक्तीचं शीर घेऊन गावभर हिंडत होता. हा व्हिडीओ सोशल मीडियावर व्हायरल झाला. त्यानंतर पोलिसांनी आरोपीला अटक केली. या प्रकरणाबाबत अतिरिक्त पोलीस अधिक्षक सुखनंदन राठोड म्हणाले की, दोघांमध्ये वादविवाद सुरू होता. त्यानंतर आरोपी माधवनं करम नावाच्या वृद्ध व्यक्तीची कुऱ्हाडीने गळा कापून हत्या केली. पोलीस आरोपीची चौकशी करत आहेत. या घटनेनंतर गावात शांतता पसरली आहे. लोकांच्या मनात दहशत आहे. अचानक घडलेल्या या प्रकारानं सगळेच भयभीत आहेत. एका क्षुल्लक कारणावरून कुणी अशाप्रकारे क्रूर हत्या का करू शकतो? असा प्रश्न गावकऱ्यांना पडला आहे.

नक्षलग्रस्त भागात हे गाव असल्याने पोलिसांनी सकाळी मृतदेहाचं पोस्टमोर्टम करून त्यांच्या नातेवाईकांकडे सुपूर्द केले. पोलिसांनी आरोपीला कोर्टात हजर केल्यानंतर त्याला जेलमध्ये पाठवण्यात आलं आहे. पोलिसांच्या माहितीनुसार, हत्या केल्यानंतर माथेफिरू युवक कापलेलं शीर हातात घेऊन २० किमी पायी चालला. माथेफिरूनं रागाच्या भरातून वृद्ध व्यक्तीची कुऱ्हाडीनं गळा कापला होता.