भयंकर! हाडांच्या कॅन्सरमुळे दिवस-रात्र वेदनेने तडफडत होता मुलगा; जन्मदात्या बापाने दिले विष

Crime News : हाडांच्या कॅन्सरमुळे त्रस्त असलेल्या 14 वर्षांच्या मुलाला त्याच्याच जन्मदात्या वडिलांनी विष देऊन जीवे मारल्याची भयंकर घटना आता समोर आली आहे.

नवी दिल्ली - देशात अनेक धक्कादायक घटना घडत आहेत. याच दरम्यान एक मन सुन्न करणारी घटना घडली आहे. हाडांच्या कॅन्सरमुळे त्रस्त असलेल्या 14 वर्षांच्या मुलाला त्याच्याच जन्मदात्या वडिलांनी विष देऊन जीवे मारल्याची भयंकर घटना आता समोर आली आहे. तामिळनाडूतील सलेममध्ये ही घटना उघडकीस आली आहे. या प्रकरणी पोलिसांनी आरोपी वडिलांसह तीन जणांना अटक केली आहे. वडिलांनी पोटच्या मुलाला तीन औषधांचे मिश्रण असलेले इंजेक्शन दिल्यानंतर त्याचा मृत्यू झाल्याची माहिती मिळत आहे.

मिळालेल्य़ा माहितीनुसार, पेरियासामी असं आरोपी वडिलांचं नाव आहे. त्याचा 14 वर्षांचा मुलगा वन्नाथामिझान हा गेल्या एक वर्षापासून हाडांच्या कॅन्सरने ग्रस्त असल्याचे प्राथमिक तपासात उघड झाले आहे. आपला मुलगा रात्रंदिवस वेदनेने तळमळताना पाहून पेरियासामी यांना त्रास व्हायचा. प्रयोगशाळा चालवणाऱ्या व्यंकटेशनशी पेरियासामीने संपर्क साधला. पेरियासामीने वेंकटेशनला आपल्या मुलाचा त्रास कसा कमी करता येईल, याबद्दल विचारलं होतं. 

तीन औषधांचे मिश्रण इंजेक्शनमधून दिले

पेरियासामी आणि वेंकटेशन यांनी प्रभू नावाच्या वैद्यकीय चिकित्सकाशी संपर्क साधला. प्रभू पेरियासामी याच्या घरी आला आणि त्याने 14 वर्षांच्या कॅन्सरग्रस्त वन्नाथामिझन याला एक इंजेक्शन दिले, ज्यानंतर मुलाचा मृत्यू झाला. पोलीस सूत्रांनी दिलेल्या माहितीनुसार, प्रभूने तीन औषधांचे मिश्रण इंजेक्शनमधून दिले होते, ज्याच्या ओव्हरडोसमुळे मुलाचा मृत्यू झाला. हे प्रकरण उघडकीस आल्यानंतर, पेरियासामी, वेंकटेशन आणि प्रभू यांना तामिळनाडूतील कोंगुनाप्रम पोलिसांनी अटक केली. त्यांच्यावर कलम 109 अंतर्गत गुन्हा दाखल करण्यात आला आहे. या प्रकरणी पुढील तपास सुरू आहे. एका हिंदी वेबसाईटने याबाबतचे वृत्त दिले आहे. 

संतापलेल्या जावयाने सासू सासऱ्यांसह आपल्या लेकालाही जिवंत जाळलं

बिहारमधील भागलपूर जिल्ह्यात माणुसकीला काळीमा फासणारी एक घटना घडली आहे. एका संतापलेल्या जावयाने दारुच्या नशेत सासू-सासऱ्यांवर पेट्रोल टाकून त्यांना जिवंत जाळल्याची धक्कादायक घटना घडली आहे. पीरपेंती ब्लॉकच्या एकचारी दियारा येथे ही भयंकर घटना समोर आली आहे. इतकंच नव्हे तर त्याने आपल्या पाच वर्षांच्या मुलालाही आगीच्या स्वाधीन केले. जावयाने तिघांवर पेट्रोल ओतताच, पेट्रोलच्या वासाने सासरे सुरेश मंडल यांना जाग आली. त्यावेळी जावयाने घरात कोणीही जिवंत राहणार नाही अशी धमकी दिली.