विकृतीचा कळस! प्रॅक्टिकलच्या बहाण्याने थांबवलं; गुंगीचं औषध देत 17 मुलींचं लैंगिक शोषण केलं

Crime News : दहावीत असलेल्या 17 विद्यार्थिनींना प्रॅक्टिकल परीक्षेचा बहाणा करत शाळेतच थांबण्यास सांगितलं. यानंतर त्याने त्यांच्या जेवणात गुंगीचं औषध मिसळलं आणि सहकाऱ्यासोबत मिळून लैंगिक शोषण केलं आहे.  

नवी दिल्ली - देशात अनेक धक्कादायक घटना घडत आहेत. याच दरम्यान माणुसकीला काळीमा फासणारी एक घटना समोर आली आहे. उत्तर प्रदेशच्या मुझफ्फरनगरमध्ये गुंगीचं औषध देत 17 मुलींचं लैंगिक शोषण केल्याची संतापजनक घटना घडली आहे. शाळेच्या मुख्याध्यापकाने परीक्षेच्या बहाण्याने विद्यार्थिनींचा विनयभंग केल्याचा आरोप करण्यात आला आहे. मुख्याध्यापकाने दहावीत असलेल्या 17 विद्यार्थिनींना प्रॅक्टिकल परीक्षेचा बहाणा करत शाळेतच थांबण्यास सांगितलं. यानंतर त्याने त्यांच्या जेवणात गुंगीचं औषध मिसळलं आणि सहकाऱ्यासोबत मिळून लैंगिक शोषण केलं आहे.  

पोलीस या प्रकरणाचा अधिक तपास करत आहेत. आरोपीला पकडण्यासाठी टीम तयार करण्यात आल्या आहेत. योग्य ती कारवाई केली जाईल अशी माहिती पोलिसांनी दिली आहे. या घटनेने परिसरात एकच खळबळ उडाली आहे. दोन विद्यार्थिनीच्या पालकांनी स्थानिक आमदार प्रमोद उत्तवाल यांच्याकडे मदत मागितली असता त्यांनी वरिष्ठ पोलीस अधीक्षक अभिषेक यादव यांच्याशी संपर्क साधत चौकशी करण्यास सांगितलं. तोपर्यंत मुलींच्या कुटुंबाने वारंवार पोलीस तक्रार दाखल करण्याचे प्रयत्न केले होते. पण त्यांना मदत मिळत नव्हती असा दावा कुटुंबीयांनी केला आहे.

मुख्याध्यापकाने परीक्षेच्या बहाण्याने केला विद्यार्थिनींचा विनयभंग

तक्रारदार मुलीने दिलेल्या माहितीनुसार, "मुख्याध्यापक योगेश यांनी प्रॅक्टिरल परीक्षेच्या बहाण्याने आम्हा 16 ते 17 मुलींना बोलावून घेतलं. आम्हाला लिहायचं असल्याचं सांगत रात्री शाळेतच थांबण्यास सांगण्यात आलं. दुसऱ्या दिवशी अजून प्रॅक्टिकल असतील असं सांगण्यात आलं. यावेळी मुलींनी खिचडी बनवली असता ती नीट शिजली नसल्याचं मुख्याध्यापक म्हणाले. यानंतर त्यांनी स्वत: बनवली आणि आम्हाला खायला दिली. खिचडी खाताच आम्ही बेशुद्ध पडलो आणि त्यानंतर आमचा विनयभंग करण्यात आला."

आरोपीचा शोध घेण्यासाठी पोलिसांची पाच पथकं तयार 

पोलिसांनी याप्रकरणी शाळेचा मुख्याध्यापक जिथे विद्यार्थिनी शिकतात आणि प्रॅक्टिकल परीक्षेच्या बहाण्याने ज्या शाळेत नेलं त्याच्या मालकाविरोधात गुन्हा दाखल केला. यामधील एकाला अटक करण्यात आली आहे. तर दुसऱ्या आरोपीचा शोध घेण्यासाठी पोलिसांची पाच पथकं तयार करण्यात आली आहेत. याप्रकरणी तक्रार दाखल करुन न घेणाऱ्या अधिकाऱ्याविरोधात निलंबनाची कारवाई करण्यात आली आहे. एका हिंदी वेबसाईटने याबाबतचे वृत्त दिले आहे.