Crime News: प्रेयसीच्या लग्नात प्रियकराचा धुडगूस, वराच्या हातून माळ खेचत वधूच्या गळ्यात घातली, कुंकूही लावले, त्यानंतर...

Crime News: वधू-वरांनी एकमेकांना वरमाला घालण्यापूर्वीच वधूचा प्रियकर स्टेजवर आला. त्याने वराच्या हातून माळ काढून घेत ती प्रेयसी असलेल्या वधूच्या गळ्यात घातली. एवढ्यावरच तो थांबला नाही. त्यानंतर त्याने त्या वधूच्या डोक्यावर कुंकूही लावले.

पाटणा - लग्नसराईच्या दिवसांमध्ये लग्नसोहळ्यांमध्ये आधीच्या प्रेमप्रकरणातून घडलेले धक्कादायक किस्से समोर येत आहेत. अशीच एक विचित्र घटना बिहारमधील एरई गावात घडली आहे. येथे वधू-वरांनी एकमेकांना वरमाला घालण्यापूर्वीच वधूचा प्रियकर स्टेजवर आला. त्याने वराच्या हातून माळ काढून घेत ती प्रेयसी असलेल्या वधूच्या गळ्यात घातली. एवढ्यावरच तो थांबला नाही. त्यानंतर त्याने त्या वधूच्या डोक्यावर कुंकूही लावले.

पाटणामध्ये घडलेली ही घटना गेल्या सोमवारची असल्याचे सांगण्यात येत आहे. ऐन लग्नसोहळ्यात घडलेली ही घटना परिसरात चर्चेचा विषय ठरली आहे. दरम्यान, लग्नसोहळ्यास उपस्थित असलेल्या वऱ्हाडी मंडळींनी प्रियकराला बेदम मारहाण केली. मात्र वधूने तिच्या प्रियकराला वाचवण्याचा खूप प्रयत्न केला. त्यानंतर ग्रामस्थांनी या प्रियकराला पोलिसांच्या स्वाधीन केले. तसेच झाल्या प्रकारामुळे संतप्त झालेले वऱ्हाडी लग्न न लावताच निघून गेले.

या तरुणीच्या वडिलांनी तिचा विवाह नवादा जिल्ह्यतील जवाहरनगरमधील रहिवासी असलेल्या दिवाकर पांडेय यांचा मुलगा अक्षय कुमार याच्याशी निश्चित केला होता. सोमवारी रात्री वरात बँडबाजासह गावात पोहोचली. ११ च्या सुमारास जयमाला घालण्याची तयारी सुरू होती. यादरम्यान वधूच्या सांगण्यावरून तिचा प्रियकर अमित कुमार हा अचानक लग्नस्थळी स्टेजवर आला. त्याने फिल्मी स्टाईलमध्ये वराकडून माळ खेचत वधूच्या गळ्यात घातली. त्यानंतर तिच्या डोक्यावर कुंकूही लावले.

मात्र या घटनेबाबत वधूच्या नातेवाईकांना पोलिसांकडे कुठल्याही प्रकारची लेखी तक्रार दिलेली नाही. त्यामुळे पोलिसांनी सदर तरुणाला पीआर बाँडवर मुक्त केले. लग्नसोहळ्यादरम्यान घडलेल्या या अजब घटनेची संपूर्ण परिसरामध्ये चर्चा सुरू आहे.