हत्या की आत्महत्या? बाप-लेकीचा लटकलेल्या अवस्थेत सापडला मृतदेह; खोलीत झोपलेली पत्नी, म्हणाली...

Crime News : वडील आणि एक वर्षाच्या मुलीचा मृतदेह खोलीत लटकलेल्या अवस्थेत आढळून आला आहे. धक्कादायक बाब म्हणजे जेव्हा ही घटना घडली तेव्हा पत्नी देखील घरामध्ये उपस्थित होती.

नवी दिल्ली - देशात अनेक धक्कादायक घटना घडत आहेत. अशीच एक भयंकर घटना आता समोर आली आहे. उत्तर प्रदेशच्या गाझियाबादमध्ये वडील आणि एक वर्षाच्या मुलीचा मृतदेह खोलीत लटकलेल्या अवस्थेत आढळून आला आहे. धक्कादायक बाब म्हणजे जेव्हा ही घटना घडली तेव्हा पत्नी देखील घरामध्ये उपस्थित होती. ती दुसऱ्या खोलीत झोपली असल्याचं म्हटलं जात आहे. पतीने कधी हे टोकाचं पाऊल उचललं हे समजलंच नाही असं देखील पत्नीने म्हटलं आहे. पतीचा मृतदेह हा बेडवर बसून गळफास घेतलेल्या अवस्थेत असल्याने ही हत्या आहे की आत्महत्या याचा पोलीस शोध घेत आहेत

पोलिसांनी दिलेल्या माहितीनुसार, हापुड येथे राहणाऱ्या 25 वर्षीय अमित गाझियाबादच्या बहरामपूर गावामध्ये पत्नी आणि मुलांसोबत राहत होता. सेल्समनची नोकरी करत होता. गुरुवारी रात्री अमित आणि त्यांची पत्नी घरामध्ये वेगवेगळ्या खोलीत झोपले होते. त्यानंतर सकाळी पत्नीला त्यांचा मृतदेह दिसला. तिने आरडाओरडा करून शेजाऱ्यांना आपल्या घरी बोलावलं. यानंतर पोलिसांना देखील घटनेची माहिती देण्यात आली. अमितच्या पत्नीने पोलिसांना दिलेल्या माहितीनुसार, रात्री दोन वाजता पती-पत्नीमध्ये काही कारणावरून वाद झाला. यानंतर ते दोघेही वेगवेगळ्या खोल्यांमध्ये निघून गेले. 

कौटुंबिक भांडणातूनच अमितने एक वर्षाच्या मुलीची गळ्या दाबून हत्या केली आणि त्यानंतर आत्महत्या केली अशी शक्यता वर्तवण्यात येत आहे. य़ा घटनेने परिसरात एकच खळबळ उडाली आहे. या घटनेमुळे अनेक प्रश्न निर्माण झाले आहे. पत्नीने हे कधी झालं याबाबत मला काहीच माहीत नसल्याचं म्हटलं आहे. तर शेजारी राहणाऱ्या रवि जाटव याने तरुणाची हत्या करून मृतदेह लटकवल्याचं म्हटलं आहे. पोलीस या प्रकरणाचा अधिक तपास करत असून पोस्टमार्टम रिपोर्टमधून नेमकं कारण समोर येईल असं म्हणत आहेत. एका हिंदी वेबसाईटने याबाबतचे वृत्त दिले आहे.