ऑनर किलिंग! जेवणासाठी बोलावलं अन् विष दिलं; प्रेमप्रकरण तरुणाच्या जीवावर बेतलं, घटनेने खळबळ

Crime News : तरुणीच्या कुटुंबीयांनी बेदम मारहाण करून तरुणाला विष भरवल्याची भयंकर घटना घडली आहे. या घटनेने परिसरात एकच खळबळ उडाली आहे.

नवी दिल्ली - झारखंडच्या दुमकामध्ये माणुसकीला काळीमा फासणारी एक धक्कादायक घटना समोर आली आहे. प्रेमप्रकरण एका तरुणाच्या जीवावर बेतलं आहे. तरुणीच्या कुटुंबीयांनी बेदम मारहाण करून तरुणाला विष भरवल्याची भयंकर घटना घडली आहे. या घटनेने परिसरात एकच खळबळ उडाली आहे. मिळालेल्या माहितीनुसार, ऑनर किलिंगचा प्रकार घडल्याचा संशय व्यक्त होत आहे. या भागात मेडिकल कॉलेजमध्ये शिकणाऱ्या विवेक कुमार साह याचं एका मुलीसोबत प्रेमप्रकरण सुरू होतं. शेजारच्या गावात राहणाऱ्या या मुलीचंही विवेकवर प्रेम होतं आणि दोघांनी लग्न करण्याची तयारी केली होती. 

प्रेमप्रकरणाची माहिती दोघांच्याही कुटुंबीयांना माहीत होती, मात्र मुलीच्या कुटुंबीयांचा या लग्नाला कडाडून विरोध होता. मुलीच्या कुटुंबीयांनी तरुणाविरोधात पोलीस ठाण्यात तक्रार दाखल केली होती. पोलिसांनी दोघांच्याही घरच्यांना बोलावून घेत तरुणाला समज दिली होती. त्याच्याकडून सहीदेखील करून घेण्यात आली होती. या प्रकारामुळे दोन्ही कुटुंबीयांमध्ये तणावाचं वातावरण निर्माण झालं होतं. घटनेच्या दिवशी तरुणाला तरुणीच्या फोनवरून एक फोन आला. त्याला घरी बोलावण्यात आलं. घरी पोहोचल्यानंतर त्याला बेदम मारहाण करण्यात आली.

जेवणातून तरुणाला जबरदस्तीने देण्यात आलं विष

जेवणातून तरुणाला जबरदस्तीने विष देण्यात आलं. या अवस्थेत तरुण कसाबसा घरी पोहोचला आणि त्याने आपल्यासोबत घडलेला धक्कादायक प्रकार सांगितला. विवेकची प्रकृती बिघडल्याने त्याला उपचारासाठी तातडीने रुग्णालयात दाखल करण्यात आलं. मात्र वेळेत उपचार न मिळाल्यामुळे त्याचा मृत्यू झाल्याचा आरोप आता कुटुंबीयांनी केला आहे. मुलाला वेळेवर उपचार मिळाले असते, तर तो वाचू शकला असता, असा दावा विवेकच्या वडिलांनी केला आहे.

पोलीस कारवाईत हलगर्जीपणा करत असल्याचा आरोप

विवेकने मृत्यूआधी दिलेल्या माहितीत तरुणीच्या कुटुंबीयांचं नाव घेतलं असलं तरी पोलीस सध्या पोस्टमॉर्टेम रिपोर्टची वाट पाहत आहेत. त्यानंतर कुटुंबीयांना अटक करण्याबाबत निर्णय घेतला जाईल, अशी माहिती पोलिसांनी दिली आहे. तर पोलीस कारवाई करण्याबाबत हलगर्जीपणा करत असल्याचा आरोप मृत तरुणाच्या कुटुंबीयांनी केला आहे. विवेकच्या नातेवाईकांनी तरुणीचं कुटुंब, पोलीस आणि रुग्णालयावर गंभीर आरोप केले आहेत. पोलीस या प्रकरणाचा अधिक तपास करत आहेत. एका हिंदी वेबसाईटने याबाबतचे वृत्त दिले आहे.