Crime News: प्रख्यात युट्युबर तरुणीची निर्घृण हत्या, चेहरा विद्रुप केला, मृतदेह जमिनीत गाडला 

Crime News: हरियाणामधील रोहतक जिल्ह्यात एक हृदयद्रावक घटना घडली आहे. जिल्ह्यातील महम येथे एका तरुणीचा मृतदेह जमिनीत गाडलेल्या अवस्थेत सापडला. तरुणीची ओळख दिल्लीतील प्रसिद्ध युट्युबर संगीत उर्फ दिव्या अशी पटली आहे.

रोहतक - हरियाणामधील रोहतक जिल्ह्यात एक हृदयद्रावक घटना घडली आहे. जिल्ह्यातील महम येथे एका तरुणीचा मृतदेह जमिनीत गाडलेल्या अवस्थेत सापडला. तरुणीची ओळख दिल्लीतील प्रसिद्ध युट्युबर संगीत उर्फ दिव्या अशी पटली आहे. ही तरुणी गेल्या ११ दिवसांपासून बेपत्ता होती. नातेवाईकांनीं तिचे अपहरण झाल्याची तक्रारसुद्धा दाखल केली होती. दिल्लीमध्ये तिची हत्या करून नंतर तिचा मृतदेह महम येथे गाडण्यात आला, असा दावा करण्यात येत आहे. दरम्यान, पोलिसांनी सदर तरुणीचा मृतदेह ताब्यात घेऊन तो पोस्टमार्टेमसाठी रुग्णालयातील शवागारात ठेवला आहे. तसेच मृत तरुणीच्या नातेवाईकांना याची माहिती देण्यात आली आहे.

दरम्यान, मृतदेह सापडल्याची महिती मिळाल्यानंतर पोलिसांनी घटनास्थळावर एफएसएलच्या टीमलाही पाचारण केले आहे. तपासानंतर टीमने सांगितले की, तरुणीच्या डोक्यावर जखमांची खूण आहे. तसेच दुसऱ्या ठिकाणी हत्या करून मृतदेह विद्रुप करण्याच्या हेतूने तो खड्डा खोदून दफन करण्यात आला होता. मृत तरुणीचा चेहरा पूर्णपणे कुजून गेला होता. एफएसएलच्या टीमने संपूर्ण परिसरात तपास करून पुरावे गोळा केले आहेत.

पोलिसांनी सांगितले की, तरुणी तिचा एक युट्युब चॅनल चालवत होती. आज तिच्या मृतदेहाचे पोस्टमार्टेम केलं जाईल. पोलिसांना तिच्या दोन सहकलाकारांवर संशय आहे. सध्या ते दोघेही बेपत्ता आहेत. त्यांचा शोध घेतला जात आहे.

एक व्यक्ती लघुशंका करण्यासाठी आडोशाला गेला असताना त्याने हात बाहेर आलेला पाहिला. त्याने या प्रकारची माहिती पोलिसांना दिली. सूचना मिळताच पोलीस घटनास्थळी दाखल झाले आणि त्यांनी जमीन खोदून मृतदेहाला बाहेर काढले, तेव्हा हा एका तरुणीचा मृतदेह असल्याचे समोर आले.  तिचा मृतदेह चेहरा विद्रुप केलेल्या अवस्थेत होता.