जन्मदाताच झाला हैवान! 10 महिन्यांच्या लेकीला जमिनीवर आपटून मारलं; कारण ऐकून बसेल धक्का

Crime News : वडिलांनी आपल्या दहा महिन्यांच्या निष्पाप मुलीला फरशीवर आपटून आपटून मारल्याची धक्कादायक घटना आता समोर आली आहे.

नवी दिल्ली - पंजाबमधून एक मन सुन्न करणारी घटना घडली आहे. जन्मदाताच हैवान झाला आहे. वडिलांनी आपल्या दहा महिन्यांच्या निष्पाप मुलीला फरशीवर आपटून आपटून मारल्याची धक्कादायक घटना आता समोर आली आहे. यामध्ये मुलीच्या आजी-आजोबांनी देखील साथ दिली आहे. मिळालेल्या माहितीनुसार, मुक्तसर जिल्ह्यातील रणजीतगड गावात ही घटना घडली. या घटनेमुळे संपूर्ण परिसरात एकच खळबळ उडाली असून पोलीस तपास सुरू असल्याची माहिती आहे.

आरोपी पिता हा सैनिक असून सध्या अंबाला इथे तैनात आहेत. गुन्ह्यात आरोपीच्या पालकांच्या नावाचाही समावेश आहे. पोलिसांनी सर्वांविरुद्ध विविध कलमान्वये गुन्हा दाखल केला आहे. मुख्य आरोपी असलेले मुलीचे वडील फरार असून पोलिसांनी आरोपीच्या वडिलांना अटक केली आहे. अंबाला कॅंटमध्ये तैनात असलेल्या सतनाम सिंहचा विवाह लखोके बहराम (फिरोजपूर) गावात राहणाऱ्या अमनदीप कौरसोबत दीड वर्षांपूर्वी झाला होता.

लग्नानंतर काही दिवसांतच सतनामचे अमनदीप कौरसोबत भांडण सुरू झाले. अमनदीपच्या चारित्र्यावर संशय येऊ लागल्याने त्यांच्यातील वाद वाढतच गेला. याच दरम्यान, त्याने अमनदीपला घरातून हाकलूनही दिलं होतं. त्यावेळी अमनदीप गरोदर होती. सतनामने पत्नी अमनदीपपासून घटस्फोटासाठी न्यायालयात खटला दाखल केला. दुसरीकडे, अमनदीपने सतनामची तक्रार लष्कराच्या अधिकाऱ्यांकडे केली. या प्रकरणी लष्कराच्या अधिकाऱ्यांनी अंबाला कॅन्टला फोन करून दोघांशी बोलणे केले. 

अमनदीप कौरने आपल्या माहेरी एका मुलीला जन्म दिला. मुलगी झाल्यानंतरही दोन्ही कुटुंबात वाद होत होते. 12 जुलै रोजी पुन्हा दोघांना बोलावून त्यांना 20 दिवस एकत्र राहण्याचे आदेश दिले. यानंतर सतनामने पत्नी अमनदीप कौरला रणजीतगड गावात आणले. यानंतर जेव्हा भांडण झालं तेव्हा सतनामने अमनदीप कौरच्या हातातून मुलीचा हिसकावून घेतलं, आणि तिचे पाय पकडून तिला जमिनीवर आपटलं. यामध्ये तिचा मृत्यू झाला. एका हिंदी वेबसाईटने याबाबतचे वृत्त दिले आहे.