धक्कादायक! महिला मृत्यूच्या दारात असताना 'डॉक्टर' गेली 'मॉर्निंग वॉक'ला; गुन्हा दाखल

Crime News : डॉक्टरच्या हलगर्जीपणामुळे एका महिलेला आपला जीव गमवावा लागला आहे. धक्कादायक बाब म्हणजे महिलेला मृत्यूच्या दारात सोडून महिला डॉक्टर मॉर्निंग वॉकसाठी निघून गेल्याचा गंभीर आरोप कुटुंबीयांनी केला आहे.

जालना - जालन्यामध्ये एक भयंकर घटना समोर आली आहे. डॉक्टरच्या हलगर्जीपणामुळे एका महिलेला आपला जीव गमवावा लागला आहे. धक्कादायक बाब म्हणजे महिलेला मृत्यूच्या दारात सोडून महिला डॉक्टर मॉर्निंग वॉकसाठी निघून गेल्याचा गंभीर आरोप कुटुंबीयांनी केला आहे. त्यामुळे प्रसूती दरम्यान रक्तस्त्राव होऊन महिलेचा मृत्यू झाला. जालना शहरातील दरगड हॉस्पिटलमध्ये १३ एप्रिल रोजी ही घटना घडली होती. या प्रकरणाचा अहवाल आल्यानंतर शुक्रवारी दरगड हॉस्पिटलमधील महिला डॉक्टरवर सदर बाजार पोलीस ठाण्यात गुन्हा दाखल करण्यात आला आहे.

मिळालेल्या माहितीनुसार, देऊळगाव राजा शहरातील गजानन नगर येथील रहिवासी विकास लिधोरीया यांच्या पत्नीला १३ एप्रिल रोजी जालना शहरातील दरगड हॉस्पिटलमध्ये प्रसूतीसाठी दाखल केले होते. मात्र डॉक्टर प्रसूती झाल्यानंतर रक्तस्त्राव होत असताना देखील त्यावर कोणताही उपाय, उपचार न करता कामाचा फारसा अनुभव नसलेल्या नर्सच्या भरवश्यावर सोडून मॉर्निंग वॉकला निघून गेल्या. 

प्रसूतीनंतर महिलेला रक्ताची अत्यंत गरज होती. पण गरज असतानाही महिला डॉक्टरने नातेवाईकांना रक्त आणण्यास सांगितले नाही. शिवाय, स्वत: ही रक्ताची व्यवस्था केली नाही. प्रसूती झाल्यानंतर त्यांना रक्तस्त्राव होत होता. तो सुध्दा थांबविण्यात आला नाही. त्यामुळे त्या महिलेचा मृत्यू झाल्याची माहिती कुटुंबीयांनी दिली आहे. नातेवाईकांनी याची तक्रार जिल्हा शल्यचिकित्सकांकडे केली. 

प्रकरणाची चौकशी करण्यासाठी तज्ञ डॉक्टरांची समिती स्थापन करण्यात आली होती. या समितीने नुकताच अहवाल दिला असून, त्यात महिलेचा मृत्यू हा रक्तस्त्रावामुळे झाल्याचे नमूद करण्यात आले आहे. शिवाय, डॉक्टरांनी हयगय व निष्काळजीपणा केल्याचे सांगण्यात आले. या प्रकरणी विकास लिधोरीया यांच्या फिर्यादीवरून दरगड हॉस्पिटलमधील महिला डॉक्टराविरुद्ध सदर बाजार पोलीस ठाण्यात गुन्हा दाखल करण्यात आला असून, पुढील तपास पोउपनि. चाटे हे करीत आहेत.