"जान मैं मर रही हूं", इन्स्टाग्रामवर मेसेज करत तरुणीची आत्महत्या; लव्हस्टोरीचा भयंकर शेवट

Crime News : एका तरुणीने प्रेमप्रकरणातून विष पिऊन आत्महत्या केली. विष घेण्यापूर्वी तिने इन्स्टाग्रामवर "जान मैं मर रही हूं" असं लिहिलं होतं.

नवी दिल्ली - छत्तीसगडमध्य़े एक धक्कादायक घटना घडली आहे. कोरबा येथे एका तरुणीने प्रेमप्रकरणातून विष पिऊन आत्महत्या केली. विष घेण्यापूर्वी तिने इन्स्टाग्रामवर "जान मैं मर रही हूं" असं लिहिलं होतं. तसेच मोबाईलवर रडत रडत मुलीने विष पितानाचा व्हिडिओही रेकॉर्ड केला. याच दरम्यान, मध्यरात्रीनंतर नातेवाईकांच्या ही गोष्ट लक्षात येताच तिला जिल्हा रुग्णालयात उपचारासाठी दाखल करण्यात आले. मात्र, उपचारादरम्यान तिचा मृत्यू झाला. ही घटना बाकीमोंगरा पोलीस ठाण्याच्या हद्दीतील आहे.

कोरबा येथील बाकीमोंगरा पोलीस ठाण्याच्या हद्दीतील गजरा बस्ती येथे 19 वर्षीय तरुणीने विष पिऊन आत्महत्या केली. मिळालेल्या माहितीनुसार, शनिवारी रात्री पूजा घरात जेवण करून झोपली होती. मात्र, मध्यरात्री पूजाची तब्येत ढासळू लागली. यावेळी पूजाच्या घरच्यांनी तिची चौकशी केली असता तिने, विष प्यायल्याचे सांगितले. यानंतर पूजाला जिल्हा रुग्णालयात दाखल केले असता उपचारादरम्यान तिचा मृत्यू झाला. कुटुंबीयांनी सांगितले की, पूजा एक वर्षापूर्वी बांकीमोंगरा येथील एका कपड्याच्या दुकानात काम करत होती.

कुटुंबीयांनी पोलिसांना दिलेल्या माहितीनुसार, वर्षभरापूर्वी तिचे रोहित गंभीर नावाच्या तरुणासोबत प्रेमसंबंध जुळले होते. काही दिवसांपूर्वी दोघेही एकत्र घरातून पळून गेले होते. यानंतर नातेवाईकांनी समजावल्यानंतर तिला घरी आणले. विष पिण्यापूर्वी पूजाने रोहितला स्वतः विष घेत आत्महत्या करत आहे, असा मेसेजही पाठवला आणि मोबाईलवर रडत विष पितानाचा व्हिडिओही तयार केला. 

दरम्यान, शवविच्छेदन करून मृतदेह कुटुंबीयांच्या ताब्यात देण्यात आला आहे. मात्र, आता पूजाच्या मृत्यूमागे रोहित जबाबदार आहे का? असा प्रश्न उपस्थित होत आहेत. पोलीस या प्रकरणाचा अधिक तपास करत आहेत. या घटनेने कुटुंबीयांना मोठा धक्का बसला असून परिसरात एकच खळबळ उडाली आहे. एका हिंदी वेबसाईटने याबाबतचे वृत्त दिले आहे.