Crime News: काकूसोबतच 'लिव्ह इन'मध्ये पुतण्या, किरकोळ वादातून कुऱ्हाडीने हत्या

पोलिसांनी माहिती मिळताच घटनास्थळी धाव घेतली. याप्रकरणी पुतण्याविरुद्ध गुन्हा दाखल करण्यात आला असून पोलिसांनी लगेचच पथके पाठवून 30 वर्षीय पुतण्याला जवळील जंगलातून अटक केली

उदयपूर - राजस्थानच्या उदयपूर जिल्ह्याच्या खेरोदा ठाणे परिक्षेत्रात एका महिलेचा कुऱ्हाडीने वार करुन खून करण्यात आला. महिलेची हत्या करणारा हा तिचा पुतण्याच असल्याचे उघडकीस आले आहे. हत्येपूर्वी दोघांमध्ये वाद झाला, या वादातून रागाच्या भरात पुतण्याने काकूवर कुऱ्हाड चालवून तिची हत्या केली. मृत महिलेचे वय 35 वर्षे असून जागीच तिचा मृत्यू झाला. तर, पुतण्याचे वय 30 वर्षे आहे. 

पोलिसांनी माहिती मिळताच घटनास्थळी धाव घेतली. याप्रकरणी पुतण्याविरुद्ध गुन्हा दाखल करण्यात आला असून पोलिसांनी लगेचच पथके पाठवून 30 वर्षीय पुतण्याला जवळील जंगलातून अटक केली. मृत महिलेचा पती नानालाल यांचा दोन वर्षांपूर्वी आजाराने मृत्यू झाला होता. नाता प्रथेनुसार नानालाल यांनी 12 वर्षांपूर्वी महिलेशी विवाह केला होता. लग्नानंतर दोघांना दोन मुलंही झाली. मात्र, पतीच्या निधनानंतर महिलेने पुतण्यासोबत संबंध प्रस्थापित केले. त्यानंतर, महिला कैलाशी आणि पुतण्या भुरालाल हे लिव्ह इन रिलेशनपशीपमध्ये राहत होते. महिलेचे दोन्ही मुलेही त्यांच्यासमवेतच राहत. 

नानालाल यांचा भाऊ बाबरू याने संबंधित घटनेची फिर्याद पोलिस ठाण्यात दिली. आम्ही तिघे भाऊ असून मोठ्या भावाचे नाव भेजा आणि लहान्या भावाचे नाव नानालाल आहे. नानालाल यांचा दोन वर्षांपूर्वी आजारी असल्याने मृत्यू झाल्याची माहितीही बाबरु यांनी पोलिसांना दिली. घटनेवेळी भुरालाल आणि मृत महिलेचे दोन्ही मुलेही घरातच होते, असेही बाबरु यांनी सांगितले. जेव्हा बाबरू यांनी हे दृश्य पाहिले, तेव्हा सर्वप्रथम पोलिसांना माहिती दिली.