Crime News: थरकाप उडवणारी घटना, मुंबईत प्रेमप्रकरणातून तीन महिलांची हत्या करत एकाची आत्महत्या? रुग्णालयात मृतदेह सापडल्याने खळबळ  

Crime News: मुंबईतील कांदिवली पश्चिम परिसरात एकाच कुटुंबातील चौघांचे मृतदेह सापडल्याने खळबळ उडाली आहे. एका ड्रायव्हरने प्रेमप्रकरणातुन डॉक्टरची पत्नी आणि त्याच्या दोन मुलीची हत्या करत आत्महत्या केल्याची प्राथमिक माहिती समोर आली आहे.

- गौरी टेंबकर - कलगुटकर

मुंबई - मुंबईतील कांदिवली पश्चिम परिसरात एकाच कुटुंबातील चौघांचे मृतदेह सापडल्याने खळबळ उडाली आहे. एका ड्रायव्हरने प्रेमप्रकरणातुन डॉक्टरची पत्नी आणि त्याच्या दोन मुलीची हत्या करत आत्महत्या केल्याची प्राथमिक माहिती समोर आली आहे. कांदिवली पोलिसानी घटनास्थळी धाव घेत पुढील तपास सुरू केला आहे. सर्व मृतदेह शताब्दी रुग्णालयात पाठवण्यात आले असून, घटनास्थळी पाच सुसाईड नोटही सापडल्या आहेत, असे पोलीस सूत्रांकडून सांगण्यात आले आहे.

किरण दळवी, मुस्कान दळवी, भूमी दळवी आणि शिवदयाल सेन अशी मृतांची नावं आहेत. दरम्यान, भूमी दळवी नामक महिलेच्या  प्रेमात पडल्याने तीन महिलांची हत्या करून गळफास घेतल्याचा उल्लेख ड्रायव्हर शिव दयाल याच्या खिशात सापडलेल्या सुसाईड नोटमध्ये करण्यात आला आहे, या घटनेमुळे परिसरात खळबळ उडाली आहे.

याबाबत मिळालेल्या सविस्तर माहितीनुसार कांदिवली देना बँक जंक्शन येथे एक माणूस हातात विळा घेऊन फिरत आहे अशी माहिती कांदिवली पोलिसांना नियंत्रण कक्षावर मिळाली. त्यानुसार मोबाईल व्हॅनसह रात्र पाळीवर असलेल्या पोलीस निरीक्षक पीआय वारे घटनास्थळी पोहोचल्या आणि त्यांनी परिसराची झडती घेतली. लोकांशी विचारपूस केली असता त्यांनी सांगितले की त्यांनी एका व्यक्तीला २ महिलांसह दळवी हॉस्पिटलच्या इमारतीत जाताना पाहिले आणि त्यांना त्यांच्या ओरडण्याचा आवाज आला. डिटेक्शन कर्मचारी आणि मोबाईल कर्मचाऱ्यांच्या मदतीने परिसराची झडती घेतली असता रुग्णालयाच्या दुसऱ्या मजल्यावर दोन महिलांचे मृतदेह रक्ताच्या थारोळ्यात सापडले. पहिल्या मजल्यावरही शोध घेतला असता तेथे दोन व्यक्ती लटकलेल्या अवस्थेत आढळल्या अशी माहिती पोलिसांकडून मिळत आहे.याप्रकरणी कांदिवली पोलीस अधीक तपास करत आहेत.