खळबळजनक! दोन नातवंडांना घेऊन आजीने मारली विहिरीत उडी; कारण ऐकून बसेल मोठा धक्का

Crime News : एका 65 वर्षीय महिलेने आपल्या दोन नातवंडांना घेऊन विहिरीत उडी मारत आत्महत्या केली.

नवी दिल्ली - देशात अनेक भयंकर घटना घडत आहेत. अशीच एक मन सुन्न करणारी घटना आता समोर आली आहे. एका 65 वर्षीय महिलेने आपल्या दोन नातवंडांना घेऊन विहिरीत उडी मारत आत्महत्या केली. विहिरीत पडल्याने आजींसह दोन्ही नातवंडांचा मृत्यू झाला आहे. या घटनेने परिसरात एकच खळबळ उडाली असून सर्वांनाच मोठा धक्का बसला आहे. राजस्थानच्या सिरोही जिल्ह्यातील कालंद्री पोलीस ठाण्य़ाच्या परिसरात ही धक्कादायक घटना घडली. पोलीस या प्रकरणाचा अधिक तपास करत आहेत. 

मिळालेल्या माहितीनुसार, महिलेची मानसिक अवस्था ठीक नव्हती. तसेच कुटुंबाची परिस्थिती देखील अत्यंत बिकट आहे. गावातील 65 वर्षीय जत्तू देवी या आपला मुलगा मंगलाराम, त्याची पत्नी आणि पाच नातवंडांसोबत राहत होत्या. या कुटुंबाची आर्थिक स्थितीही चांगली नसल्याची माहिती समोर आली आहे. आर्थिक परिस्थिती चांगली नसल्याने मंगलाराम हे आपल्या आईवर उपचार सुद्धा करू शकत नव्हते. सोमवारी जत्तू देवी यांचा मुलगा मंगलाराम आणि सून शेतात काम करत होते. 

जत्तू देवी यांनी आपला नातू भाया आणि नात ममता यांना घेऊन विहिरीत उडी मारली. बराचवेळा झाला आपली मुलं आणि आई दिसत नसल्याने मंगलाराम यांनी त्यांना आवाज देण्यास सुरुवात केली. मात्र, तरीही कुठलाच प्रतिसाद न आल्याने त्यांनी शोधाशोध सुरू केली. शोधाशोध सुरू असतानाच विहिरीत डोकावून पाहिले असता आजी जत्तू देवी आणि दोन्ही नातवंड विहिरीत आढळून आले. ग्रामस्थांनी या तिघांनाही बाहेर काढण्याचे प्रयत्न सुरू केले. 

घटनेची माहितीही पोलिसांना दिली. पोलीस घटनास्थळी दाखल झाल्यानंतर तिघांनाही विहिरीतून बाहेर काढण्यात आले. मात्र, तिघांचाही मृत्यू झाला होता. तिघांचेही मृतदेह शवविच्छेदनासाठी रुग्णालयात पाठवण्यात आले आहेत. शवविच्छेदन अहवाल आल्यानंतर मृत्यूचं नेमकं कारण हे स्पष्ट होईल. मात्र, या घटनेने संपूर्ण गावात एकच खळबळ उडाली आहे. तसेच संपूर्ण गावावर शोककळा पसरली आहे. एका हिंदी वेबसाईटने याबाबतचे वृत्त दिले आहे.