प्रेमासाठी काय पण! नवरा आणि मुलाला सोडून बॉयफ्रेंडसाठी महिला झाली चक्क 'लेडी डॉन' अन्...

Crime News : एका महिलेने आपल्या प्रियकरासाठी पतीला आणि पोटच्या मुलाला सोडलं. धक्कादायक बाब म्हणजे ती बॉयफ्रेंडच्या प्रेमात इतकी वेडी झाली की बॉयफ्रेंडसाठी तिने गुंडगिरी करण्यास सुरुवात केली.

नवी दिल्ली - प्रेमात आणि युद्धात सर्वकाही माफ असतं असं म्हटलं जातं. काही जण प्रेमासाठी वाटेल ते करतात. अशीच एक अजब घटना समोर आली आहे. एका महिलेने आपल्या प्रियकरासाठी पतीला आणि पोटच्या मुलाला सोडलं. धक्कादायक बाब म्हणजे ती बॉयफ्रेंडच्या प्रेमात इतकी वेडी झाली की बॉयफ्रेंडसाठी तिने गुंडगिरी करण्यास सुरुवात केली. लेडी डॉन झाली. अखेर पोलिसांनी सापळा रचून या लेडी डॉनला ताब्यात घेतलं. या घटनेने परिसरात एकच खळबळ उडाली आहे. नगमा असं या आरोपी महिलेचं नाव आहे. 

नगमा ही पटनामधील एका मध्यमवर्गीय कुटुंबातील स्त्री आहे. लग्नानंतर ती राहुल नावाच्या एका व्यक्तीच्या प्रेमात पडली. राहुल हा गुन्हेगारी प्रवृत्तीचा व्यक्ती होता. चोरी, लुटमार आणि तस्करी प्रकरणी तो अनेकदा तुरुंगात देखील गेला आहे. नगमा राहुलसाठी तस्करी आणि चोरी करायची. दरम्यान या दोघांनी अनिशाबाद येथील एक मोबाईलचं दुकान लुटण्याचा प्रयत्न केला. दुकानदाराला घाबरवण्यासाठी त्यांनी गोळीबार देखील केला होता. 

चोरीची चौकशी करत असताना पोलीस नगमापर्यंत येऊन पोहोचले. मिळालेल्या माहितीनुसार पोलिसांनी CCTV फुटेजच्या मदतीने नगमाला शोधून काढलं. त्यावेळी चौकशीदरम्यान खरा प्रकार समोर आला. नगमाचे राहुलसोबत गेल्या अनेक वर्षांपासून संबंध आहेत. राहुलसाठी तिने आपल्या नवऱ्याला आणि मुलाला देखील सोडून दिलं होतं. परंतु 2015 तो एका हत्येच्या प्रकरणात तुरुंगात गेला होता. 

काही महिन्यांपूर्वी तो तुरुंगातून सुटून आला. परंतु बाहेर येताच त्यांनी पुन्हा एकदा लुटमार करण्याचा प्रयत्न केला अन् ते अखेर पकडले गेले. राहुल तुरुंगात असताना त्याच्यावतीने नगमा त्याची टोळी चालवत होती. त्यामुळे अनेक धक्कादायक प्रकरणात तिचा देखील समावेश होता. पण आता तिला पकडण्यात पोलिसांना यश आलं आहे. एका हिंदी वेबसाईटने याबाबतचे वृत्त दिले आहे.