आता फक्त गर्भाशय अन् कब्रस्तानात आम्ही सुरक्षित; अंगावर काटा आणणारी नोट लिहून पीडितेची आत्महत्या

Crime News : मुलीने आत्महत्या करण्यापूर्वी अंगावर काटा आणणारी एक सुसाईड नोट लिहिली आहे. या घटनेने एकच खळबळ उडाली आहे.

नवी दिल्ली - देशात महिलांवरील अत्याचाराच्या, बलात्काराच्या आणि लैंगिक शोषणाच्या अनेक घटना या सातत्याने समोर येत आहेत. अशीच एक मन सुन्न करणारी घटना आता घडली आहे. अकरावीत शिकणाऱ्या एका विद्यार्थिनीने लैंगिक छळ झाल्यामुळे आत्महत्या केली आहे. चेन्नईच्या पूनमल्ली भागात ही घटना घडली. या मुलीने आत्महत्या करण्यापूर्वी अंगावर काटा आणणारी एक सुसाईड नोट लिहिली आहे. या घटनेने एकच खळबळ उडाली आहे.

"आईचं गर्भाशय आणि कब्रस्तान ही दोनंच सुरक्षित ठिकाणं" असं म्हणत मुलीने आपलं जीवन संपवलं आहे. मुलीने सुसाईड नोटमध्ये तिच्या एकाकीपणाबद्दल, तिच्यासोबत घडलेल्या अत्याचाराबद्दल लिहिलं आहे. मिळालेल्या माहितीनुसार, अकरावीत शिकणाऱ्या मुलीने आई घराबाहेर पडल्यानंतर आत्महत्या केली आहे. आई घरात परत आल्यानंतर तिला ही घटना समजली. मुलीच्या आत्महत्येने कुटुंबीयांना धक्का बसला आहे. 

"आता सहन होत नाही, शिकण्याची अजिबाच इच्छा नाही"

मुलीला गळफास घेतलेल्या अवस्थेत पाहून कुटुंबीय घाबरले. त्यांनी तातडीने या घटनेची माहिती पोलिसांना दिली. पोलीस घरी आल्यावर त्यांनी तपास केला असता एक सुसाईड नोट सापडली. त्यामध्ये Stop Sexual Harrasment या शब्दाने नोटची सुरुवात करण्यात आली होती. आता सहन होत नाही. शिकण्याची अजिबाच इच्छा नाही. वाचण्याची आणि लिहिण्याची क्षमताच राहिलेली नाही. वाईट स्वप्न पडतात. जी झोपू देत नाहीत असं मुलीने नोटमध्ये म्हटलं आहे. 

"प्रत्येक आईवडिलांनी आपल्या मुलांना मुलीचा सन्मान करायला शिकवायला हवं. नातेवाईक किंवा शिक्षकांवर विश्वास ठेवू नका. एकचं सुरक्षित ठिकाण आहे ते म्हणजे आईचं गर्भाशय आणि कब्रस्तान" असं देखील मुलीने सुसाईड नोटमध्ये म्हटलं आहे. पोलिसांनी तिच्या मित्र-मैत्रिणींकडे याबाबत चौकशी केली असता त्यांनी गेल्या काही दिवसांपासून ती शांतच राहत असल्याचं म्हटलं आहे. तसेच पोलीस या प्रकरणाचा अधिक तपास करत आहेत. अनेकांची चौकशी करण्यात येत आहे. एका हिंदी वेबसाईटने याबाबतचे वृत्त दिले आहे.