मूर्तीकारासह तीन मंडळाच्या पदाधिकाऱ्यावर गुन्हे दाखल

Crime News : रथ चौकातील श्रीराम तरुण सांस्कृतिक मित्र मंडळ, सराफ बाजारातील साईनाथ तरुण मित्र मंडळ व सागर पार्कसमोरील श्रीमंत रामशेठ चौबे परिवार गणेश मंडळाचा त्यात समावेश आहे.

ठळक मुद्देकोरोना संसर्गाच्या पार्श्वभूमीवर शासनाने यंदा देखील मिरवणूकांवर बंदी घालून सार्वजनिक मंडळांसाठी चार फुट तर घरगुतीसाठी २ फुट उंचीची मूर्ती स्थापन करण्याचे आदेश दिलेले आहेत.शासनाच्या नियमाबाबत पोलीस अधीक्षक डॉ.प्रवीण मुंढे यांच्या आदेशाने सर्व मंडळाच्या पदाधिकाऱ्यांना तसेच मूर्तीकारांना सीआरपीसी १४९ प्रमाणे नोटीस बजावण्यात आली होती, तरी देखील नियमांचे उल्लंघन झाले.

जळगाव : शासनाने ठरवून दिलेल्या नियमापेक्षा जास्त मोठी मूर्ती तयार केली व त्या मुर्तीची स्थापना केली म्हणून पुन्हा तीन मंडळाच्या पदाधिकाऱ्यांविरुध्द वेगवेगळ्या पोलीस ठाण्यात गुन्हे दाखल करण्यात आले असून मुर्तीकारालाही त्यात आरोपी करण्यात आले आहे. दोन दिवसात मुर्तीकाराविरुध्द चार गुन्हे दाखल झाले आहेत. रथ चौकातील श्रीराम तरुण सांस्कृतिक मित्र मंडळ, सराफ बाजारातील साईनाथ तरुण मित्र मंडळ व सागर पार्कसमोरील श्रीमंत रामशेठ चौबे परिवार गणेश मंडळाचा त्यात समावेश आहे.

कोरोना संसर्गाच्या पार्श्वभूमीवर शासनाने यंदा देखील मिरवणूकांवर बंदी घालून सार्वजनिक मंडळांसाठी चार फुट तर घरगुतीसाठी २ फुट उंचीची मूर्ती स्थापन करण्याचे आदेश दिलेले आहेत. या नियमांचे उल्लंघन झाल्यास कारवाई करण्याचा इशारा दिला आहे. असे असतानाही रिंगरोडवरील एलआयसी कॉलनीतील राजेंद्र राणा यांना सात फूट उंचीची मूर्ती तयार केली.

रथ चौकातील श्रीराम तरुण सांस्कृतिक मित्र मंडळाचे अध्यक्ष जीवन पुंडलिक तायडे व उपाध्यक्ष राहूल दादू मिस्तरी (दोन्ही रा.कोळी पेठ), सराफ बाजारातील साईनाथ तरुण मित्र मंडळाचे अध्यक्ष भोजराज मानसिंग राजपूत (रा.मारवाडी व्यायाम शाळेजवळ), चेतन दिलीप तिवारी (रा.डेमला कॉलनी), मुर्तीकार राजेंद्र चंदुलाल राणा (रा.रिंग रोड) यांच्याविरुध्द शनी पेठ पोलीस ठाण्यात गुन्हा दाखल झाला आहे. गोपनीयचे पोलीस कर्मचारी गिरीश पाटील यांनी सरकारतर्फे फिर्याद दिली आहे.

मूर्तीकार राजेंद्र चंदुलाल राणा (रा.रिंग रोड) यांनी चार फुटापेक्षा जास्त उंचीची मूर्ती बनवून श्रीमंत रामशेठ चौबे परिवार गणेश मंडळ, सागर पार्क समोर यांना विक्री करुन शासनाच्या नियमांचे उल्लंघन केले.याप्रकरणी जिल्हा पेठ पोलिसात गुन्हा दाखल असून पोलीस कर्मचारी उमेश पाटील यांनी सरकारकडून फिर्याद दिली आहे. पहिल्याच दिवशी बळीराम पेठेतील आझाद क्रिडा व सांस्कृतिक मंडळाच्या पदाधिकाऱ्यांसह मूर्तीकाराविरुध्द गुन्हा दाखल झाला होता. दरम्यान, शासनाच्या नियमाबाबत पोलीस अधीक्षक डॉ.प्रवीण मुंढे यांच्या आदेशाने सर्व मंडळाच्या पदाधिकाऱ्यांना तसेच मूर्तीकारांना सीआरपीसी १४९ प्रमाणे नोटीस बजावण्यात आली होती, तरी देखील नियमांचे उल्लंघन झाले.