रॉड, काठीच्या जबर मारहाणीत जखमी झालेल्या युवकाचा मृत्यू 

गुन्हा दाखल : शेल्हाळ येथील घटना 

उदगीर (जि. लातूर) : तालुक्यातील शेल्हाळ येथे एका युवकावर गावातील काही जणांनी लोखंडी रॉड आणि काठीने प्राणघातक हल्ला केल्याची घटना ४ सप्टेंबर रोजी घडली. दरम्यान, यामध्ये गंभीर जखमी झालेल्या युवकाचा लातूर येथील एका रुग्णालयात उपचारादरम्यान सोमवारी मृत्यू झाला. या घटनेने एकच खळबळ उडाली आहे. 

पोलिसांनी सांगितले, ४ सप्टेंबर रोजी सायंकाळी ७ वाजण्याच्या सुमारास फिर्यादी प्रवीण उर्फ शेखर लिंबाजी कांबळे (रा. शेल्हाळ ता. उदगीर) यांच्या घरासमोर गावातीलच शेखर विजयकुमार कांबळे, माधव विजयकुमार कांबळे, सुजित राजकुमार कांबळे, प्रदीप मधुकर कांबळे, राजकुमार रमेश कोयले, किरण मोरे, भरत विठ्ठल पुरी यांनी संगनमत करून जुन्या भांडणाची कुरापत काढत, आमच्या विरोधात नेहमीच का बोलतो म्हणुन, फिर्यादीचा भाऊ आरविंद लिंबाजी कांबळे (वय १८ )  याला  लोखंडी रॉड आणि काठीने जबर मारहाण केली. शिवाय, जीवे मारण्याच्या उद्देशाने गळा दाबून लोखंडी रॉडने मानेवर मारुन गंभीर जखमी केले. यात गंभीर जखमी झालेल्या युवकाला उपचारासाठी लातूर येथील एका खाजगी रुग्णालयात दाखल केले होते. उपचारादरम्यान सोमवारी सकाळी त्या युवकाचा मृत्यू झाला. 

याबाबत उदगीर ग्रामीण पोलीस ठाण्यात आरोपीविरुद्ध ५ सप्टेंबर रोजी विविध कलमान्वये गुन्हा दाखल करण्यात आला होता. आता यामध्ये अतिरिक्त कलमाची वाढ केली जाणार असल्याचे पोलिसांनी सांगितले.