एसआरए सदनिका ट्रान्सफर करण्यासाठी एक लाख रुपयांची मागणी, दहिसर उपजिल्हाधिकारी कार्यालयावर खासदारांचे भ्रष्टाचाराचे गंभीर आरोप 

Mumbai News:

मुंबई-एसआरएचे घर 10 वर्षे विकत येत नाही आणि विकत घेणाऱ्याच्या नावावर ट्रान्सफर होत नाही असा कायदा आहे. सरकारकडे एसआरएचे घर ट्रान्सफर करण्याचा प्रस्ताव प्रलंबित असतांना मात्र दहिसरच्या उपजिल्हाधिकारी कार्यालयाचे काही अधिकारी दहिसर येथील एसआरए वसाहतीत जाऊन दरवाज्यावर एक लाख रुपये भरा अश्या नोटिसा लावून जात आहेत. विशेष म्हणजे या नोटिसवरील जानेवारी २०२१ची तारीख कट करून यावर पाचव्या महिन्याची तारिख टाकण्यात आली आहे,आणि या नोटीसा नवव्या महिन्यात एसआरए सदनिका धारकांना देण्यात आल्या. त्यामुळे अश्याप्रकारे भ्रष्टाचार करणाऱ्या येथील अधिकाऱ्यांना जाब विचारण्यासाठी उत्तर मुंबईचे भाजपा खासदार गोपाळ शेट्टी यांनी चक्क दहिसरच्या उपजिल्हाधिकारी कार्यालयावर आज आपला मोर्चा वळवला.आणि सोशल मीडियावर व्हिडिओ जारी करून त्यांनी येथील भ्रष्टाचार उघडकीस आणला. याप्रकरणी मुख्यमंत्री उद्धव ठाकरे आणि गृहनिर्माण मंत्री जितेंद्र आव्हाड यांनी जातीने लक्ष घालून झोपडपट्टीवासीयांना दिलासा द्यावा अशी मागणी त्यांनी केली.

येथील अधिकारी हरिश्चंद्र पाटील आणि गुलाम परदेशी या अधिकाऱ्यांची बदली झाली असून येथे नवीन अधिकाऱ्यांची अजून नियुक्ती झाली नाही. त्यामुळे येथील अधिकाऱ्यांना तर भ्रष्टाचाराला कुरण मिळाले असा आरोप त्यांनी केला.

झोपडपट्टीवासीयांनी एसआरएतून घेतलेली सदनिका विक्रीची सध्याची  १० वर्षांची मर्यादा ५ वर्षे करावी आणि सदनिका ट्रान्सफर शुल्क कमी करण्याच्या माजी मुख्यमंत्री देवेंद्र फडणवीस यांच्या प्रस्तावाला आघाडी सरकारने अजून मंजूरी दिली नाही अशी माहिती त्यांनी दिली. मग कोणत्या आधारावर सदर सदनिका ट्रान्सफरच्या नावाखाली येथील उपजिल्हाधिकारी कार्यालयाच्या अधिकाऱ्यांनी एक लाख रुपयांची मागणी करण्याचे नवे षडयंत्र सुरू करून झोपडपट्टीवासीयांना घाबरवण्याचा प्रयत्न करत असल्याची माहिती भाजपा व शिवसेनेच्या कार्यकर्त्यांनी आपल्याला दिली. त्यामुळे असे प्रकार जर दहिसरला सुरू असतील तर मुंबईत देखिल सुरू असतील असा टोला त्यांनी लगावला.जर झोपडपट्टीधारकांकडून कोणी अश्या प्रकारे पैसे मागायला घरी येत असतील तर त्यांनी मला थेट फोन करावा, मी स्वतः त्यांच्याकडे येईल आणि संबंधित अधिकाऱ्यांना जाब विचारेल असे आवाहन त्यांनी केले.