मूसेवाला हत्याकांडातील दोन गँगस्टरचे एन्काउंटर; पाकमध्ये पळून जाण्यासाठी लपलेले शेतात

पंजाबी गायक सिद्धू मूसेवाला हत्याकांडात सामील असलेला जगरूप रूपा व मनप्रीत मन्ना या दोन गँगस्टरला पंजाब पोलिसांनी अमृतसरमधील चकमकीत ठार केले.

बलवंत तक्षक, लोकमत न्यूज नेटवर्क

चंडीगड : पंजाबी गायक सिद्धू मूसेवाला हत्याकांडात सामील असलेला जगरूप रूपा व मनप्रीत मन्ना या दोन गँगस्टरला पंजाबपोलिसांनी अमृतसरमधील चकमकीत ठार केले. भारत-पाक सीमेपासून १० किलोमीटर अंतरावरील भकना गावातून दोघेही पाकमध्ये पळण्याच्या प्रयत्नात असताना ही चकमक झाली. सिद्धू मूसेवालाची २९ मे रोजी गँगस्टरनी दिवसाढवळ्या गोळ्या झाडून हत्या केली होती. या प्रकरणात आतापर्यंत गँगस्टर लॉरेन्स बिश्नोईसह १८ जणांना गजाआड करण्यात आलेले आहे.

पोलीस महासंचालक गौरव यादव यांनी सांगितले की, भकना गावातील शेतात हे दोघे दडले होते. मागील दीड महिन्यापासून पोलीस त्यांच्या मागावर होते. पोलीस व गँगस्टरमध्ये पाच तास चकमक चालली. तीन पोलीस जखमी झाले. गँगस्टरच्या जवळून एक एके-४७ व एक पिस्टल जप्त केले. अँटी गँगस्टर टास्क फोर्सचे प्रमुख एडीजीपी प्रमोद भान यांनी सांगितले की, रूपा व मन्ना हे दोघे भकना गावात दडल्याची गुप्त माहिती मिळाली होती.