बारामती तालुक्यात आढळला अर्धवट जळालेला पुरुषाचा मृतदेह

मृतदेहाची ओळख पटवण्यासाठी पोलिसांचे प्रयत्न सुरू.

बारामती (मेखळी) : बारामती तालुक्यातील मेखळी येथील बरकडवाडी येथे एका पुरुषाचा अर्धवट जळालेला मृतदेह सापडल्याने खळबळ उडाली आहे. बरकडवाडी येथील स्मशानभूमीमध्ये सापडलेल्या या मृतदेहाची ओळख अद्याप पटलेली नाही. परंतु, मृतदेहाची अवस्था पाहून अंगावर शहारे येत असल्याचे स्थानिकांनी सांगितले.

गुरुवारी(दि.१७ डिसें) रोजी सकाळी ६ च्या सुमारास एका व्यक्तीचा अर्धवट जळालेला मृतदेह आढळला. हा मृतदेह सापडल्यानंतर परिसरात खळबळ उडाली आहे. मृत व्यक्तीचे वय सुमारे ३० असल्याचा अंदाज आहे. मृतदेहाची ओळख पटवण्यासाठी पोलिसांचे प्रयत्न सुरू आहेत.

मेखळीचे पोलीस पाटील सुभाष भोसले यांना सकाळी ६ च्या सुमारास या घटनेची माहिती मिळाल्यानंतर त्यांनी घटनास्थळी धाव घेतली.त्यावेळी मृतदेहावरील कपडे जळत असल्याचे निदर्शनास आल्यानंतर त्यांनी बारामती तालुका पोलीस स्टेशनचे निरीक्षक महेश ढवाण यांना घटनेची माहिती देऊन वरिष्ठांच्या परवानगीने त्यांनी आग विझवली.घटनास्थळी सापडलेल्या वस्तूच्या साहाय्याने सदर मृतदेह हा ऊसतोड मजुराचा असावा असा प्राथमिक अंदाज पोलिसांनी वर्तवला आहे.सदर व्यक्तीची ओळख पटली नसून हत्या करून मृतदेह डिझेल टाकून जाळला असावा, अशी शंका व्यक्त केली जात आहे. बारामती तालुका पोलीस ठाण्याचे निरीक्षक महेश ढवाण पोलीस पथकासह घटनास्थळी दाखल झाले होते.