‘त्या’ महागडया मोबाईने फोडले बिंग, घरफोडीच्या गुन्हयातील सराईत चोरटा गजाआड

House Breaking Case : रेकी करून करायचा चोऱ्या

डोंबिवली:  घरफोडी गुन्हयातील सुरज रामदास चव्हाण या सराईत चोरटयाला रामनगर पोलिसांनी अटक केली आहे. ठाकुर्ली 90 फिट रोडवर पोलिसांनी गस्ती दरम्यान संशयावरून त्याला ताब्यात घेण्यात आले. त्याची अंगझडती घेतली असता दोन महागडे मोबाईल त्याच्याकडे आढळुन आले. पडताळणी केली असता ते एका मोबाईल शॉपच्या घरफोडीच्या गुन्हयातील असल्याचे निष्पन्न झाले. यावरून त्याला अटक केली असता त्याच्याकडून घरफोडीचे पाच गुन्हे उघडकीस आणण्यात पोलिसांना यश आले आहे.

28 ऑगस्टला मध्यरात्री डोंबिवली पूर्वेकडील आगरकर रोडवर महावीर नॉव्हेल्टी मोबाईल शॉपचे टाळे तोडून चोरटयांनी 7 महागडे मोबाईल आणि रोकड असा 97 हजार 569 रूपयांचा मुद्देमाल चोरून नेला होता. हा चोरीचा प्रकार सीसीटिव्ही कॅमेरात कैद झाला होता. दरम्यान मंगळवारी रात्री पोलिस उपनिरिक्षक दिपक दाभाडे, पोलिस हवालदार शंकर निवळे, पोलिस नाईक विशाल वाघ, गणेश गिते, सोमनाथ पिचड, दिलीप कोती, वैजीनाथ रावखंडे, जालींदर साळुंखे, निलेश पाटील आदि पोलिसांचे पथक शहरात गस्त घालत असताना 90 फिट रोडवर  त्यांना एकजण संशयतरित्या फिरताना आढळुन आला. तेव्हा त्याच्याकडे दोन महागडे मोबाईल आढळुन आले. संबंधित व्यक्तीला पोलिसी खाक्या दाखविताच आगरकर रोडवर मोबाईल शॉपमध्ये घरफोडी केल्याची त्याने कबुली दिली. दरम्यान पुढच्या तपासात त्याच्याकडून डोंबिवलीसह ठाणो, कल्याण, मुंबई याठिकाणचे पाच गुन्हे उघडकीस आणण्यात रामनगर पोलिसांना यश आले.  त्याच्याकडून पाच मोबाईल, टिव्ही, रोकड असा 1 लाख 7 हजार 269 रूपयांचा चोरीचा मुद्देमाल हस्तगत करण्यात आला आहे. विशेष बाब म्हणजे मुंबईत त्याच्याविरोधात 16 चोरीचे गुन्हे दाखल असल्याची माहीती सहाय्यक पोलिस आयुक्त जय मोरे यांनी दिली. चव्हाण हा सराईत गुन्हेगार असल्याने मुंबईतून तो काही वर्षे तडीपार होता. तो सध्या खडवली येथे वास्तव्याला होता. घरफोडीच्या गुन्हयातील सराईत असलेला सूरज हा वयाच्या 12 व्या वर्षापासून चोरीचे गुन्हे करीत आहे. तो रेकी करून घरफोडी करायचा. त्याने आणखीन किती गुन्हे केले आहेत याचा तपास सुरू आहे. त्याला 4 सप्टेंबरपर्यंत कल्याण जिल्हा सत्र न्यायालयाने पोलिस कोठडी सुनावल्याची माहीती मोरे यांनी दिली.