लग्नात आलेल्या गिफ्टचा स्फोट, नवरदेवाचा हात आणि डोळ्याला गंभीर दुखापत; पत्नीच्या एक्स बॉयफ्रेंडवर संशय

या घटनेत वराचा डोळा पूर्णपणे डॅमेज झाला असून त्याचे मनगटही हातापासून वेगळे झाले आहे. याशिवाय, या स्फोटामुळे त्याच्या शरिरालाही मोठ्या प्रमाणावर इजा झाली आहे. 

सध्या सर्वत्र लग्नाचा सिझन सुरू आहे. लग्न म्हटले की कुटुंबातील सर्वच लोक आनंदाच्या भरात असतात.  मात्र गुजरातमधील एका लग्न समारंभात आलेले गिफ्ट नवरदेवाच्या कुटुंबीयांसाठी दुःखाचा डोंगर ठरले आहे. लग्नात मिळालेले हे गिफ्ट उघडल्यानंतर मोठा स्फोट झाला. यामुळे नवरदेवाला गंभीर दुखापत झाली असून त्याचा पुतण्याही जखमी झाला आहे.

ही घटना नवसारी जिल्ह्यातील वंसदा तालुक्यात मीठांबरी येथे घडली. येथे नुकताच एक लग्नसमारंभ पार पडला होता. यावेळी आलेल्या पाहुण्यांनी नवरदेव आणि नवरीला मोठ्या प्रमाणावर गिफ्ट्स दिले होते. लग्नानंतर नवविवाहित लतेश गावित लग्नात मिळालेले हे गिफ्ट्स बघत होता. याच वेळी लग्नात मिळालेल्या एका टेडी बेअरमध्ये मोठा स्फोट झाला. या स्फोटात वरासह त्याचा तीन वर्षांचा पुतण्याही गंभीर जखमी झाला आहे. त्यांना गंभीर अवस्थेत रुग्णालयात दाखल करण्यात आले आहे.

डोळ्याला दुखापत - 
या घटनेत वराचा डोळा पूर्णपणे डॅमेज झाला असून त्याचे मनगटही हातापासून वेगळे झाले आहे. याशिवाय, या स्फोटामुळे त्याच्या शरिरालाही मोठ्या प्रमाणावर इजा झाली आहे. 

एक्स बॉयफ्रेंडवर संशय - 
या घटनेसंदर्भात वराच्या सासऱ्यांनी आपल्या मुलीच्या एक्स बॉयफ्रेडवर संशय व्यक्त केला आहे. ते म्हणाले, त्यांची मुलगी सलमा हिचे लग्न लतेशसोबत झाले होते. सलमाच्या मोठ्या बहिणीचा एक्स बॉयफ्रेंड राजू धनसुख पटेलने एका आशा वर्करच्या हातून टेडी बेअरसारखे इलेक्ट्रॉनिक गिफ्ट लग्नात पाठवले होते. याशिवाय पोलिसांनाही राजूवरच संशय आहे. राजूचे सलमासोबतही प्रेमसंबंध होते आणि सूडाच्या भावनेतून त्याने ही घटना घडवून आणली, असे पोलिसांचे म्हणणे आहे. याप्रकरणी पोलिसांनी गुन्हा दाखल केला असून तपासही सुरू केला आहे.