चेहरा ते पाय... अनेक ओरखडे, जखमा; मेडिकल कॉलेजमध्ये महिला डॉक्टरचा बलात्कारानंतर खून

शुक्रवारी दुपारी हॉस्पिटलच्या कर्मचाऱ्यांनी या महिला डॉक्टरचा मृतदेह पाहिला आणि सर्वांना धक्का बसला.

कोलकाता : पश्चिम बंगालमधून धक्कादायक बातमी येत आहे. एका मेडिकल कॉलेजमध्ये महिला डॉक्टरवर बलात्कार करून तिचा नग्न अवस्थेत खून करण्यात आला आहे. शुक्रवारी दुपारी हॉस्पिटलच्या कर्मचाऱ्यांनी या महिला डॉक्टरचा मृतदेह पाहिला आणि सर्वांना धक्का बसला. नग्नावस्थेतील मृतदेहावर चेहऱ्यापासून ते पायापर्यंत अनेक जखमा होत्या. यामुळे कर्मचारी आणि डॉक्टरांमध्ये भीतीचे वातावरण निर्माण झाले आहे. 

आरजी कार वैद्यकीय महाविद्यालय आणि रुग्णालयातील ही घटना आहे. ही तरुणी दुसऱ्या वर्षाची पदव्युत्तर वैद्यकीय अभ्यासक्रमाची विद्यार्थीनी होती. चेस्ट मेडिसिन विभागात ती डॉक्टर म्हणून काम करत होती. आयसीयु विभाग असलेल्या इमारतीच्या चौथ्या मजल्यावर ती मृत आढळली. 

महिला डॉक्टरचा अशा अवस्थेत मृतदेह सापडल्याने तिच्यासोबतच्या प्रशिक्षणार्थी डॉक्टरनी आंदोलन सुरु केले. यामुळे कोलकाता पोलिसांच्या उत्तर उपनगर विभागाचे उपायुक्त अभिषेक गुप्ता यांच्या नेतृत्वात पोलीस पथक घटनास्थळी दाखल झाले. या महिला डॉक्टरच्या शरीरावर जखमांच्या खुणा आहेत. कपडे फाटलेले आहेत, अर्धनग्न अवस्थेत मृतदेह होता, असे रुग्णालयातील डॉक्टरांनी सांगितले. 

तसेच संतापलेल्या डॉक्टरांनी १० तास धरणे आंदोलन, वादावादी केली. हा गोंधळ रात्री उशिरापर्यंत सुरु होता. यानंतर मृतदेह पोस्टमार्टेमसाठी पाठविण्यात आला. महिला डॉक्टरच्या वडिलांनी आपल्या मुलीवर कॉलेज परिसरात बलात्कार करून तिचा खून करण्यात आल्याचा आरोप केला आहे. महाविद्यालय प्रशासन सत्य लपवण्याचा प्रयत्न करत आहे. या घटनेनंतर ममता यांनी पालकांना फोन करून योग्य कारवाईचे आश्वासन दिले आहे. 

या महिला डॉक्टरने रात्री २ वाजता आपल्या कनिष्ठ डॉक्टरांसोबत जेवण केले होते. विश्रांतीसाठी ती सेमिनार रुममध्ये गेली होती, असे तिच्या सहकारी डॉक्टरांनी सांगितले. तर पोलिसांनी तिच्या मानेवर, गालावर, नाकावर आणि ओठांवर ओरखड्याच्या खुणा आहेत. यामुळे तिथे झटापट झाल्याचे स्पष्ट दिसत आहे, असे म्हटले आहे.