परीक्षेत कॉपी केली म्हणून मैत्रिणींसमोर वडिलांनी झापलं; मुलीनं उचललं टोकाचं पाऊल!

राजस्थानच्या उदयपूरमध्ये एक खळबळजनक प्रकार उघड झाला आहे. एका व्यक्तीनं आपल्या मुलीला तिनं परीक्षेत कॉपी केली म्हणून तिच्या वर्ग मैत्रिंणीसमोर झापलं आणि यामुळे पुढे जे घडलं ते सर्वांना धक्का देणारं ठरलं आहे. मैत्रिणींसमोर आपला अपमान झाल्यानं निराश झालेल्या मुलीनं घरी येऊन विष प्राशन करत आत्महत्या केली आहे. तिला तातडीनं उपचारासाठी रुग्णालयात दाखल करण्यात आलं होतं पण उपचारादरम्यान तिचा मृत्यू झाला आहे. उदयपूरमधील फलासिया परिसरातील बिछीवाडा येथील ही घटना आहे. इयत्ता ८ वीत शिकणाऱ्या १३ वर्षीय मुलीचा मृत्यू झाल्याची माहिती पोलिसांना देण्यात आली. पोलिसांनी मृतदेह शविविच्छेदनासाठी पाठवला आहे. 

पोलिसांनी दिलेल्या माहितीनुसार, बिछीवाडा येथे सिनीअर स्कूलमध्ये २२ फेब्रुवारी २०२२ रोजी हिंदीचा पेपर होता. यावेळी संबंधित मुलीकडे कॉपी पकडण्यात आली. त्यानंतर तिच्या वडिलांना जे त्याच शाळेच्या ग्रंथालयात कामाला आहेत त्यांनी सर्वांसमोर आपल्या मुलीला झापलं. यामुळे दु:खी झालेल्या मुलीनं घरी आल्यानंतर विषारी पदार्थ खाऊन आत्महत्या केली.