बोगस बांधकाम मंजुरी नकाशाप्रकरणी तब्बल १७ वर्षांनी विकासकावर गुन्हा दाखल 

Mira Bhayander News : विकासकाने मात्र अनधिकृत ७ मजली इमारत उभारून त्यातील गाळे, सदनिका विकून खूप पैसे कमावला.

मीरारोड - मीरा भाईंदरमध्ये अनधिकृत बांधकामे करण्यात आघाडीवर असलेल्या ओस्तवाल बिल्डरने भाईंदरच्या ओस्तवाल ऑर्नेट इमारतीच्या नोंदणी वेळी २००४ साली दाखल केलेला पालिकेचा बांधकाम मंजुरी नकाशा बनावट असल्याचे उघडकीस आला आहे. त्यामुळे विकासक उमरावसिंह ओस्तवाल विरुद्ध तब्बल १७ वर्षांनी या प्रकरणी भाईंदरच्या नवघर पोलीस ठाण्यात गुन्हा दाखल करण्यात आला आहे. भाईंदरच्या जेसलपार्क येथे असलेली ओस्तवाल ऑर्नेट २ ही ७ मजली अनधिकृत इमारत आहे. वास्तविक १९९६ साली पालिकेने नकाशा मंजुरी करून बांधकाम परवानगी दिली होती. परंतु विकासकाने मंजूर नकाशा व्यतिरिक्त अनधिकृत बांधकाम केल्याने पालिकेने त्या नंतर जोत्याचे दाखला पासून भोगवटा दाखला सदर इमारतीस दिला नाही. 

विकासकाने मात्र अनधिकृत ७ मजली इमारत उभारून त्यातील गाळे, सदनिका विकून खूप पैसे कमावला. अनधिकृत टॉवर असून देखील महापालिकेने तोडक कारवाई केली नाहीच उलट संरक्षण देत पुरवल्या. सदर अनधिकृत इमारतीत गाळा असलेले शिजॉय मॅथ्यू यांनी राजीव देशपांडे सह सदर अनधिकृत इमारत आणि विकासक ओस्तवाल बिल्डर विरुद्ध तक्रारी व पाठपुरावा चालवला. नोंदणी कार्यालयाने सुद्धा सदर इमारतीतील मालमत्तांची खरेदी-विक्री नोंदणी तक्रारी नंतर बंद केली. दरम्यान महापालिका मात्र अनधिकृत बांधकामे पडण्यास टाळाटाळ करत आहे. काही दिवसां पूर्वी पालिकेने तळ आणि पहिल्या मजल्याचे काही गाळ्यांचे बांधकाम पडले. परंतु इमारतच अनधिकृत असताना व गच्चीवर भले मोठे बेकायदा बांधकाम असताना त्यावर मात्र अजून कारवाई केलेली नाही. 

मॅथ्यू यांच्या तक्रारीनंतर प्रभाग अधिकारी दामोदर संख्ये यांनी २२ एप्रिल रोजी नवघर पोलिसांना चक्क टपालाने पत्र पाठवून ओस्तवाल बिल्डर ने बनावट बांधकाम मंजुरी नकाशा बनवला असल्याने पालिका व गाळेधारकांची फसवणूक केली म्हणून गुन्हा दाखल करण्यास विनंती केली. पोलीस ठाण्यात जाऊन फिर्याद देण्या ऐवजी चक्क टपालाने पत्र पाठवणाऱ्या प्रभाग अधिकारी दामोदर संख्ये यांनी विकासकाम पाठीशी घालण्यासाठी तसेच अनधिकृत बांधकाम वाचवण्यासाठी असे खेळ चालवल्याचे आरोप तक्रारदाराने केले. 

दुसरीकडे गृहनिर्माण संस्थांची नोंदणी करणाऱ्या उपनिबंधक, सहकारी संस्था यांनी देखील २००४ साली गृहनिर्माण संस्था नोंदणी साठी सादर केलेल्या कागदपत्रात बांधकाम नकाशा बनावट असल्याचे १४ मे २०२१ रोजीच्या पत्रान्वये नवघर पोलिसांना कळवून ओस्तवाल विरुद्ध गुन्हा दाखल करण्यास सांगितले. अखेर पोलिसांनी २१ मे रोजी उमरावसिंह ओस्तवाल विरूद्ध विविध कलमां खाली गुन्हा दाखल केला आहे. परंतु अद्याप आरोपीला अटक केलेली नाही. आरोपीने आणखी फसवणुकीचे प्रकार अनधिकृत बांधकामे करून केल्याने सखोल चौकशी करण्यासाठी त्यास तात्काळ अटक करा. संरक्षण देणाऱ्या अधिकाऱ्यांना सुद्धा आरोपी करा अशी मागणी तक्रारदार मॅथ्यू यांनी केली.