आधी इन्स्टाग्रामवर भेट, नंतर दिली ऑफर; तरुणीवर धावत्या कारमध्ये केला सामूहिक बलात्कार

एका २३ वर्षीय तरुणीवर धावत्या कारमध्ये सामूहिक बलात्कार करण्यात आल्याची घटना घडली आहे. या प्रकरणी पोलिसांनी आरोपीला बेड्या ठोकल्या. 

Crime News in Marathi : इन्स्टाग्रामवर भेट झाली. मित्र बनले. नंतर त्याने चित्रपटात काम मिळवून देण्याची ऑफर देत भेटायला बोलावले आणि घात झाला. एका २३ वर्षीय तरुणीवर धावत्या कारमध्ये सामूहिक बलात्कार करण्यात आल्याची घटना उघडकीस आली आहे. या प्रकरणी पोलिसांनी दोघांना अटक केली आहे. 

उत्तर प्रदेशातील लखनौ-बाराबांकी महामार्गावर ही घटना घडली आहे. पीडितेचा इन्स्टाग्रामवरील मित्र यातील प्रमुख आरोपी असून, त्याचे नाव विपीन सिंह असे आहे. 

चित्रपटात काम देण्याची ऑफर

इन्स्टाग्रामवर भेट झाल्यानंतर विपीन सिंहने तरुणीला चित्रपटात काम मिळवून देण्याची ऑफर दिली होती. कानपूरची रहिवासी असलेल्या या तरूणीला विपीनने लखनौला भेटायला बोलावले होते. 

एका चित्रपट दिग्दर्शकाशी भेट घालून द्यायची आहे, असे त्याने पीडितेला सांगितले होते. आरोपी विपीनने सांगितल्याप्रमाणे पीडिता लखनौला आली. 

२८ ऑगस्ट रोजी पीडिता विपीनला चिन्हाटमध्ये भेटली. त्यानंतर एका चित्रपट दिग्दर्शकाला भेटायचे आहे, असे सांगून आरोपी तिला कारमधून ऑफिसला घेऊन गेला. तिथे ती त्या व्यक्तीला भेटली. नंतर विपीनने तिला मतियारी क्रॉसिंगजवळ सोडतो म्हणून कारमध्ये बसवले. 

दोन मित्रांसोबत मिळून तरुणीवर केले अत्याचार

 मतियारी क्रॉसिंगकडे जाण्याऐवजी विपीन कार घेऊन बाराबांकी महामार्गाच्या दिशेने निघाला. त्यानंतर त्याचे दोन मित्र, विनाम सिंह आणि हिमांशु सिंह कारमध्ये बसले. त्यांनी गुंगी येणारा पदार्थ दिला, त्यामुळे पीडितेची शुद्ध हरपली. नंतर तिघांनी धावत्या कारमध्ये तरुणीवर अत्याचार केले. तरुणीला तिघांनी मारहाणही केली, असे तक्रारीत म्हटले आहे. 

जेव्हा पीडितेला जाग आली, तेव्हा ती चिन्हाटमधील एका रुममध्ये होती. समोर आरोपी विपीन बसलेला होता. त्याने पीडितेला याबद्दल कुठेही वाच्यता न करण्याची धमकी दिली होती. दरम्यान, पोलिसांनी गुन्हा दाखल करत दोन आरोपींना अटक केली आहे.