दरोडा टाकण्याच्या तयारीतील चार जणांना शस्त्रांसह अटक

लातुरातील घटना, पाच जणांविराेधात गुन्हा दाखल

राजकुमार जाेंधळे, लातूर: दराेडा टाकण्याच्या तयारीतील चाैघांना पाेलिसांनी शस्त्रासह अटक केली असून, त्यांच्या विराेधात रविवारी विवेकानंद चाैक पाेलिस ठाण्यात गुन्हा दाखल केला आहे. पाेलिसांनी सांगितले, विवेकानंद चौक पाेलिस ठाण्याच्या पाेलिसांची रविवारी पहाटे गस्त सुरू हाेती. दरम्यान, सपोनि. रामचंद्र केदार यांना माहिती मिळाली. लातुरातील एका अपार्टमेंटलगतच्या शेतात दरोडा टाकण्याच्या उद्देशाने काही सराईत गुन्हेगार लपून बसले आहेत. याच्या आधारे पोलिस निरीक्षक सुधाकर बावकर यांच्या पथकाने दराेडा टाकण्याच्या उद्देशाने लपून बसलेल्यांना चारही बाजूने वेढा घातला. त्यांना माेठ्या शिताफीने ताब्यात घेतले. एक जण अंधाराचा फायदा घेत पळून गेला.

ईश्वर गजेंद्र कांबळे (वय २१), प्रफुल श्रीमंत गायकवाड (वय २७), महादेव अशोक पाटोळे (वय २२), राहुल महादेव कसबे (वय २२) यांना ताब्यात घेतले असून, महबूब ऊर्फ गोपाळ करीम शेख (वय २८, सर्व रा. लातूर) हा पळून गेला आहे. ताब्यातील चाैघांची झाडाझडती घेतली असता, त्यांच्याकडे बतई, कोयता, चाॅपर, कत्ती असे साहित्य आढळून आले. चाैकशी केली असता दरोडा टाकण्यासाठीच अंधारात लपल्याची कबुली त्यांनी दिली. अटक करण्यात आलेले आराेपी हे पोलिस ठाण्यांच्या रेकॉर्डवरील सराईत गुन्हेगार असून, त्यांच्यावर लातूर जिल्ह्यातील विविध पोलिस ठाण्यात गंभीर स्वरुपाचे गुन्हे दाखल आहेत.

याबाबत विवेकानंद चौक पाेलिस ठाण्यात गुन्हा दाखल केला आहे. तपास पोउपनि बालाजी गोणारकर करत आहेत. ही कारवाई सपोनि. रामचंद्र केदार, उदय सावंत, पोउपनि हाजी सय्यद, संजय कांबळे, मुनवरखा पठाण, दयानंद सारोळे, सुधीर साळुंखे, संजय बेरळीकर, विनोद चलवाड, नारायण शिंदे, रमेश नामदास, मिलिंद कांबळे यांच्या पथकाने केली.