लॉरेन्स बिश्नोईचा कट्टर दुश्मन कौशल चौधरीच्या पत्नीला अटक; खंडणी मागितल्याचा गंभीर आरोप

हॉटेल मालकाकडून २ कोटी रुपयांची खंडणी मागितल्याप्रकरणी गुरुग्राम पोलिसांनी गँगस्टर कौशल चौधरीची पत्नी मनीषा हिला अटक केली आहे. मनीषा परदेशात असलेला तिचा भाऊ सौरभ गाडौली याच्यासोबत मिळून ही गँग चालवत होती. वर्चस्व प्रस्थापित करण्यासाठी ती खंडणीची मागणी करत होती आणि हॉटेलवर गोळीबारही करत होती. मनीषावर ६ गुन्हे दाखल असून ती जामिनावर जेलबाहेर आहे.

एसीपी क्राइम वरुण दहिया यांनी दिलेल्या माहितीनुसार, गेल्या दोन महिन्यांपासून हॉटेल मालकांकडून खंडणी मागितल्या जात असल्याच्या तक्रारी येत होत्या. या प्रकरणी एसटीएफसह राजस्थान पोलीस आणि गुरुग्राम पोलिसांनी कारवाई केली, त्यानंतर गुरुग्राम पोलिसांच्या गुन्हे शाखेने सोमवारी तिला पकडलं. पोलिसांनी मनीषाला देवीलाल कॉलनीतून अटक करून सहा दिवसांची पोलीस कोठडी सुनावली आहे.

एसीपीच्या म्हणण्यानुसार, मनीषा कौशलची संपूर्ण सिंडिकेट चालवत होती. मनीषानेच नीमराना, होशियारपूर आणि पंचकुलामध्ये गोळीबार केला होता. हत्येचा प्रयत्न आणि खंडणीच्या गुन्ह्यात ती तुरुंगात गेली असून जामिनावर बाहेर आल्यानंतर ती पुन्हा त्याच कामात व्यस्त आहे. सध्या पोलिसांनी या प्रकरणातील अन्य आरोपींचा शोध सुरू केला आहे.

कौशल चौधरी गुरुग्रामच्या भोंडसी जेलमध्ये आहे. कौशल चौधरी हा गँगस्टर लॉरेन्स बिश्नोईचा कट्टर दुश्मन मानला जातो. गँगस्टर देवेंद्र बंबिहाच्या हत्येनंतर चौधरीने बंबिहा गँग सांभाळली. तो पूर्वी दुबईत राहत होता आणि तेथून तो हरियाणा आणि पंजाबमध्ये गुन्हे करत असे. पण २०२१ मध्ये पंजाब आणि गुरुग्राम पोलिसांनी संयुक्त कारवाईत त्याला पकडलं. तेव्हापासून तो जेलमध्ये आहे.

लॉरेन्स बिश्नोईशी काय वैर?

कौशल चौधरीने लॉरेन्स बिश्नोईचा सहकारी विकी मिद्दूखेड़ा याची हत्या करणाऱ्यांना शस्त्रे पुरवली होती. विक्की मिद्दूखेड़ाच्या हत्येचा बदला घेण्यासाठी लॉरेन्सने सिद्धू मूसवालाची हत्या केली. सिद्धू मूसवालाच्या हत्येनंतर कौशल चौधरीने लॉरेन्स बिश्नोईला उघडपणे धमकी दिली होती की, आता तो लॉरेन्स बिश्नोईलाही मारेल. याआधीही कौशल चौधरीने इंग्लंडमध्ये लॉरेन्स बिश्नोईचे चांगले संबंध असलेल्या व्यावसायिकाच्या घरावर गोळीबार केला होता आणि घराबाहेर उभ्या असलेल्या गाड्या पेटवून दिल्या होत्या. लॉरेन्स बिश्नोईप्रमाणेच कौशल चौधरीकडेही शूटर्स, नेटवर्क आणि पैसा मोठ्या प्रमाणात आहे.