नाराज पतीचं आत्मघातकी पाऊल; पत्नीला मिठी मारली अन् काही क्षणातच होत्याचं नव्हतं झालं

या घटनेने संपूर्ण परिसरात हळहळ व्यक्त करण्यात येत आहे. पोलिसही हैराण झाले आहेत.

अहमदाबाद – गुजरातच्या अहमदाबाद येथे हैराण करणारा प्रकार समोर आला आहे. याठिकाणी नवऱ्याशी भांडण करुन माहेरी गेलेल्या बायकोविरोधात पतीन आत्मघातकी पाऊल उचललं आहे. ज्या पत्नीसोबत आयुष्यभर साथ निभवायचं वचन दिले तिचीच अखेरची गळाभेट घेत जगाचा निरोप घेतला. पती-पत्नीच्या या भांडणाचा शेवट इतका क्रूर होईल असं कुणीही कल्पना केली नसेल.

नवरा-बायकोचं प्रेम संपलं आणि एकाच स्फोटात दोघंही मृत्युमुखी पडले. गुजरातच्या अरावली जिल्ह्यातील ही घटना आहे. ४५ वर्षीय व्यक्ती लाला पागी याने हे जीवघेणं पाऊल उचललं. पत्नी शारदापासून त्याला वेगळं राहायचं नव्हतं. पत्नीचा हट्ट आणि अनेक प्रयत्नानंतरही नवऱ्याला पत्नी शारदाची नाराजी दूर करण्यात यश आलं नाही. ४५ दिवसांपूर्वी शारदानं नवऱ्याचं घर सोडलं आणि अहमदाबादपासून १३५ किमी अंतरावर असलेल्या तिच्या वडिलांच्या घरी म्हणजे माहेरी गेली.

शारदाचा भाऊ भवन म्हणाला की, माझ्या बहिणीली तिच्या नवऱ्याने आणि कुटुंबाने मानसिक आणि शारिरीक छळ केला. त्यामुळे ती या छळाला वैतागून माहेरी आली होती. गुरुवारी रात्री ९ च्या सुमारास शारदाचा पती लाला पागी सासरी पोहचला. त्याठिकाणी त्याने शारदाला बाहेर भेटण्यास बोलावले. शारदा बाहेर गेली असता त्याने तिची गळाभेट घेतली आणि मोठा स्फोट घडला. स्फोटाचा आवाज ऐकून घरातील सगळेच बाहेर आले. तेव्हा शारदा आणि तिच्या नवऱ्याच्या चिंधड्या उडल्या होत्या.

या दोघांनाही हॉस्पिटलला नेण्यात आले. स्थानिक पोलिसांना ही माहिती देण्यात आली. घटनास्थळीच शारदाचा मृत्यू झाला होता तर तिचा पती लाला पागीचाही काही वेळाने मृत्यू झाला. शारदा आणि लाला या जोडप्याला २१ वर्षीय मुलगा आहे. पागीविरोधात स्थानिक पोलीस ठाण्यात गुन्हा दाखल केला. त्याला जिलेटिनच्या कांड्या कुठे मिळाल्या त्याचा शोध घेतला जात आहे. पागीने त्याच्या छातीवर जिलेटिनच्या कांड्या बांधल्या आणि शारदाला जवळ बोलावून मिठी मारली अन् क्षणातच होत्याचं नव्हतं झालं. मात्र या घटनेने संपूर्ण परिसरात हळहळ व्यक्त करण्यात येत आहे.