खळबळजनक! मुलीच्या मित्रावर वडिलांनी, भावाने केला चाकू हल्ला; ऑनर किलिंगने दिल्ली हादरली

मुलीच्या प्रेमप्रकरणाचा राग मनात धरून संतापलेल्या वडिलांनी व मुलाने भरदिवसा तरुणावर चाकूने हल्ला केल्याची घटना घडली.

दिल्ली पुन्हा एकदा एक धक्कादायक घटना घडली आहे. जाफराबाद भागात ऑनर किलिंगच्या घटनेने खळबळ उडाली आहे. येथे मुलीच्या प्रेमप्रकरणाचा राग मनात धरून संतापलेल्या वडिलांनी व मुलाने भरदिवसा तरुणावर चाकूने हल्ला केल्याची घटना घडली. या हल्ल्यात तरुणाला आपला जीव गमवावा लागला. या घटनेचं सीसीटीव्ही फुटेजही समोर आलं आहे.

सलमान असं मृत तरुणाचं नाव आहे. ही घटना जाफराबादमधील कल्याण सिनेमाजवळील गल्ली क्रमांक 2 वर सोमवारी सायंकाळी 5 वाजण्याच्या सुमारास घडल्याचे सांगण्यात येत आहे. येथे तिघांनी बाईक चालवणाऱ्या तरुणावर चाकूने हल्ला केला. दोघांनी सलमानच्या छातीवर आणि मानेवर चाकूने वार केले. या हल्ल्यात सलमानचा मृत्यू झाला.

सुरुवातीच्या तपासात सलमान एका मुलीसोबत दोन वर्षांपासून रिलेशनशिपमध्ये असल्याचे समोर आले आहे. यावर मुलीच्या कुटुंबीयांचा आक्षेप होता. अशा स्थितीत मुलीचे वडील मंजूर आणि मुलीचा भाऊ मोहसीन यांनी सलमानवर हल्ला केला. या हल्ल्यात एका अल्पवयीन मुलाचाही समावेश होता.

सलमान बाईकवरून येत असल्याचे सीसीटीव्हीमध्ये दिसत आहे. त्यानंतर मोहसीनने त्याला अडवून मारहाण केली. यानंतर त्याच्यावर चाकूने हल्ला करण्यात आला. यानंतर सलमान खाली पडला. त्यानंतर मंजूरही तिथे पोहोचतो आणि दोघेही त्याच्यावर चाकूने वार करतात. पोलिसांनी हत्येचा गुन्हा दाखल केला आहे. पोलिसांनी तपास सुरू केला आहे. एका हिंदी वेबसाईटने याबाबतचे वृत्त दिले आहे.