दिसायला सावळी म्हणून विवाहितेला जिवंत जाळलं; अंबरनाथमधील धक्कादायक प्रकार

चिमुकला झाला पोरका; पोलिसांनी सासू लीलाबाई वायले आणि पती संगम वायले या दोघांना पोलिसांनी अटक केली 

ठाणे - दिसायला सावळी आहे आणि लग्नात हुंडा दिला नाही म्हणून एका विवाहितेला जिवंत पेटवून दिल्याची संतापजनक घटना अंबरनाथ तालुक्यात हिल लाईन पोलीस ठाण्याच्या हद्दीत घडली आहे. पेटवून देणारे नराधम एवढ्यावरच थांबले नाहीत तर त्यांनी ही आत्महत्या असल्याचा बनाव देखील रचला. याप्रकरणी पोलिसांनी सासू लीलाबाई वायले (वय -६०) आणि पती संगम वायले (वय - २४) या दोघांना पोलिसांनी अटक केली आहे. मात्र, दिड वर्षांचा चिमुकला आईच्या मायेला मुकला आहे. 

वैशाली वायले (वय - २५) ही काकडवाल गावातील दुधकर कुटूंबियांची लेक. बीएससी झालेल्या वैशालीचे दोन वर्षांपूर्वी अंबरनाथ तालुक्यातील वसार गावात संगम वायले याच्याबरोबर लग्न  झाले. मात्र, विवाह प्रसंगी मानपान आणि दागिने न दिल्याने तिचा पती संगम आणि सासू लीलाबाई वैशालीच्या अतोनात छळ करीत होती. तू दिसायला सावळी आहे मला शोभत नाही असं बोलून पती हिणवत होता. तुझ्या घरच्यांनी आम्हाला ठरल्याप्रमाणे हुंडा दिला नाही असा वैशालीचा सतत मानसिक आणि शारीरिक छळ केला जात होता. अखेर २० जुलैला रात्री १२. ३० च्या सुमारास वैशालीला तिच्या पती आणि सासूने मारहाण करून जिवंत पेटऊन दिले अशी माहिती हिल लाईन पोलीस ठाण्याचे वरिष्ठ पोलीस निरीक्षक पालांगे यांनी दिली. पुढे त्यांनी सांगितले की, आगीत होरपळून तिचा दुर्दैवी मृत्यू झाला. एवढ्यावरच न थांबता नवरा संगम याने खोलीच्या आतून लॉक करून खिडकीतून पळून जाऊन ऑफिस गाठले आणि वैशालीने आत्महत्या केलाच बनाव रचला होता. तसेच  वैशाली ही उच्च शिक्षित होती तिच्या खुप आकांशा होत्या. मात्र, सासरचे लोक चांगली वागणूक देत नसल्याने ती हताश झाली होती. तिला जिवंत जाळल्यावर तिच्या सासारच्यांनी वैशालीने स्वतः पेटवून घेतल्याचे वैशालीच्या घरच्यांना सांगितले. आपल्या पोटच्या मुलीला सासरच्यांनी जिवंत पेटवून दिल्याने दुधकर कुटुंब दुःखात बुडाले आहेत.

पोलिसांनी घटनास्थळाचा आढावा घेतल्यानंतर त्यांना थोडा संशय आला होता. त्यांनी वैशालीचा मृतदेह मुंबईला पाठवला होता तिथे तिच्या अंगावर मारहाणीच्या जखमा असल्याचे शवविच्छेदन अहवालात समोर आले. त्यानंतर हिल लाईन पोलिसात पती संगम आणि सासू लीलावतीच्या विरोधात हत्येचा आणि हुंडा बळीचा गुन्हा दाखल करून त्यांना पोलिसांनी बेड्या ठोकल्या आहेत. वैशालीला दीड वर्षाचा मुलगा आहे. मात्र तो आता आईच्या मायेला पोरका झाला आहे. सासू लीलाबाई आर्थर रोड कारागृहात खडी फोडत असून पती संगम हा पोलीस कोठडीत आहे.