"तुझ्या आईला जसं वर पोहचवलं, तसं तुलाही.."; मुलीच्या हत्येचा प्रयत्न, बापाला अटक

२९ जानेवारीच्या रात्री कोहेपिजा परिसरात सैफिया कॉलेजच्या रोडवर तेज सिंह लोढी नावाच्या व्यक्तीने त्यांच्या ८ वर्षीय मुलगी प्रीतीचा गळा कापला.

भोपाळ - पोटच्या मुलीचा गळा कापून तिला रस्त्याशेजारील झुडुपात टाकून पळालेल्या आरोपीनं त्याच्या पत्नीचाही मर्डर केला होता. आता या प्रकरणाचा तपास करणाऱ्या पोलिसांना २ वर्षापूर्वी झालेल्या खूनाचाही खुलासा झाला आहे. मुलीला मारण्याचा प्रयत्न करणाऱ्या आरोपी बापाने आधी पत्नीचा खून केला होता. त्यानंतर शहर सोडून पळून जाण्याच्या तयारीत असलेल्या आरोपीला पोलिसांनी बेड्या ठोकल्या. 

२९ जानेवारीच्या रात्री कोहेपिजा परिसरात सैफिया कॉलेजच्या रोडवर तेज सिंह लोढी नावाच्या व्यक्तीने त्यांच्या ८ वर्षीय मुलगी प्रीतीचा गळा कापला. त्यानंतर तिला मृत समजून रस्त्याशेजारील झुडुपात फेकून तिथून पळून गेला. मात्र अचानक जखमी मुलगी सावरत सावरत रस्त्यावर आली. तेव्हा काही वाहनचालकांनी तिला पाहून तातडीने जवळच्या रुग्णालयात दाखल केले. या जखमी मुलीची पोलिसांनी चौकशी केली असता तेज सिंह लोढी हा तिचा सावत्र पिता असल्याचे समोर आले. जसं तुझ्या आईला मारलं तसं तुलाही मारुन वर पाठवतो असं मुलीला मारण्याआधी आरोपीने म्हटलं होते. 

या घटनेचे गांभीर्य लक्षात घेऊन पोलिसांनी तातडीने पावले उचलली. त्यानंतर आरोपी तेज सिंह लोढीला अटक केली. आरोपीच्या चौकशीत त्याने अनेक धक्कादायक खुलासे केले. प्रीतीच्या वडिलांचे आधीच निधन झाले होते. तिची आई संगीता उर्फ अनिता ओडिशा राज्यातील संबलपूर येथे राहणारी होती. सुनीताने तेज सिंह लोढीसोबत दुसरं लग्न केले होते. २९ जानेवारी २०२२ रोजी तेज सिंह लोढीने त्याची पत्नी सुनीताला सैफिया कॉलेज रोडवरच मारून टाकले होते. पत्नीच्या चारित्र्यावरून संशय आल्याने त्याने हे कृत्य केले. मुलगी रोज तिच्या आईबद्दल वडिलांना विचारायची. सुरुवातीला तिचा काही थांगपत्ता नाही असं आरोपी मुलीला सांगायचा. 

कालांतराने मुलीच्या सततच्या प्रश्नाला कंटाळून तिच्यापासून सुटका करण्याचे तेज सिंह लोढीच्या डोक्यात आले. या विचाराने त्याच दिवशी, त्याचवेळी आणि त्याच ठिकाणी मुलीला मारण्यासाठी तो घेऊन गेला. जिथे त्याने पत्नीची हत्या केली होती. २९ जानेवारी २०२४ रोजी रात्री सैफिया कॉलेज रोडवर तेज सिंह लोढीने मुलगी प्रीतीची हत्या करण्याचा प्रयत्न केला. मात्र सुदैवाने या हल्ल्यातून ती सुखरुप बचावली. सध्या आरोपी पोलिसांच्या कोठडीत आहे. जखमी मुलीवर हमीदिया रुग्णालयात उपचार सुरू आहेत. पोलीस या प्रकरणी पुढील कारवाई करत आहेत.