२ महिन्यापासून सासरीच होता, एके रात्री डोकं फिरलं; पतीनं पत्नीसह मेहुणीलाही जीवे मारले

दीपकनं अचानक पत्नी आणि मेहुणीवर गोळी झाडली आणि त्यानंतर स्वत:वरही गोळी झाडून आत्महत्या केली.  

पटणा - बिहारची राजधानी असलेल्या पटण्यात बिगहा गावात एका पतीने पत्नी आणि मेव्हणीवर गोळीबार केला. त्यात मेहुणीचा जागीच मृत्यू झाला. त्यानंतर त्याने स्वत:वर गोळी झाडून आत्महत्या केली. या घटनेतील जखमी पत्नीला सध्या उपचारासाठी रुग्णालयात दाखल केले आहे. रविवारी ही घटना घडली तेव्हा आसपासच्या लोकांनी फोन करून पोलिसांना बोलावले. सध्या दोन्ही मृतदेह पोस्टमोर्टमसाठी पाठवले आहेत. पोलीस तपास सुरू आहे. 

पोलिसांच्या माहितीनुसार, मृतांमध्ये ३२ वर्षीय दीपक कुमार आणि मेहुणी गुडिया देवी हिचा समावेश आहे. दीपकने मृत्यूपूर्वी पत्नी लक्ष्मीदेवी हिच्यावरही गोळी झाडली. जी गोळीबारात जखमी झाली. पोलिसांना या घटनेची माहिती मिळताच तात्काळ एक पथक घटनास्थळी पोहचले. तिथे दीपक कुमार आणि त्याची मेहुणी यांचा गोळीने मृत्यू झाल्याचं आढळलं. मात्र जखमी पत्नीला तातडीने सरकारी रुग्णालयात उपचारासाठी घेऊन गेले. जिथे तिची प्रकृती चिंताजनक आहे.

काय आहे प्रकरण?

दीपक आणि गुडिया देवी यांचा मृतदेह पोस्टमोर्टमला पाठवण्यात आला आहे. दीपक आणि त्याची पत्नी यांच्यात वैवाहिक वाद होते. मागील २ महिन्यापासून दीपक त्याच्या सासरी राहत होता. रविवारी रात्री काही कारणांवरून वादाचं रुपांतर गोळीबारात झाले. दीपकनं अचानक पत्नी आणि मेहुणीवर गोळी झाडली आणि त्यानंतर स्वत:वरही गोळी झाडून आत्महत्या केली.  घटनास्थळी पोलिसांनी गुन्ह्यात वापरलेली बंदूक आणि कारतुसे जप्त केली आहेत. 

दरम्यान, घटनेच्या वेळी सासू शेतात काम करत होती. परंतु गोळीचा आवाज ऐकून ती घराकडे धावत आली. त्याठिकाणचं दृश्य पाहून तिला धक्का बसला. शेजाऱ्यांच्या मदतीने या घटनेची माहिती पोलिसांना दिली. नुकतेच गुडिया देवीचं लग्न झालं होते. तिचा नवरा गुजरातमध्ये मोलमजुरी करतो तर लक्ष्मीदेवीचं लग्न दीपकशी ३ वर्षापूर्वी झालं होते. त्यांना २ वर्षाचा मुलगा होता तर लक्ष्मी ८ महिन्याची गर्भवती होती.