विरारमध्ये पुन्हा दिवसाढवळ्या गोळीबार, तीन दिवसातील दुसरी धक्कादायक घटना

Firing Case : विरार पूर्वेकडील बरफपाडा येथे आसाराम राठोड (५०) या कंत्राटदारावर दुचाकीवरून आलेल्या दोन हल्लेखोरांनी गोळीबार केला आहे.

नालासोपारा : विरारमध्ये पुन्हा दिवसाढवळ्या गोळीबार झाल्याची धक्कादायक घटना घडली आहे. शनिवारी झालेल्या गोळीबाराची घटना ताजी असतानाच सोमवारी संध्याकाळी सहा वाजण्याच्या सुमारास पुन्हा गोळीबार झाल्याने विरारमध्ये भीतीचे वातावरण पसरले आहे.

विरार पूर्वेकडील बरफपाडा येथे आसाराम राठोड (५०) या कंत्राटदारावर दुचाकीवरून आलेल्या दोन हल्लेखोरांनी गोळीबार केला आहे. या हल्ल्यात कंत्राटदार राठोड जखमी झाले आहेत. त्यांच्यावर विरारच्या संजीवनी या रुग्णालयात उपचारात सुरू आहेत. तीन दिवसांमध्ये गोळीबाराची दुसरी घटना घडल्याने वसई-विरार शहरात खळबळ उडाली असून शहरातील कायदा व्यवस्थेचा प्रश्न निर्माण झाला आहे. शनिवारी समय चौहान या तरुणाची भर दुपारी गोळ्या घालून हत्या करण्यात आली होती. दरम्यान, राठोड यांच्यावर पूर्ववैमनस्यातून गोळीबाराची घटना घडल्याचा संशय पोलिसांनी व्यक्त केला आहे. आसाराम राठोड यांच्यावर २२ सप्टेंबर २०२० रोजी दुपारी ३ वाजण्याच्या सुमारास गोळीबाराची घटना घडली होती.

लॉजमध्ये प्रेयसीला नेऊन प्रियकराने गळा दाबून केली हत्या, प्रियकर फरार