खळबळजनक! आई-मुलानेच केली बापाची हत्या; मृतदेहाचे तुकडे फ्रिजमध्ये ठेवायचे, मग...

दिल्ली पोलिसांनी सीसीटीव्ही फुटेजच्या मदतीनं या महिलेसह २ आरोपींना अटक केली.

नवी दिल्ली - श्रद्धा वालकर हिचं हत्याकांड ताजे असतानाच दिल्लीत आणखी एक असाच भयानक प्रकार उघडकीस आला आहे. दिल्लीच्या पांडव नगर परिसरात क्राईम ब्रांचनं पतीच्या हत्येच्या आरोपात एका महिलेला तिच्या मुलासह अटक केली आहे. हे दोघंही मृतदेहाचे तुकडे करून फ्रीजमध्ये ठेवायचे. त्यानंतर दरदिवशी लपूनछपून तुकडे बाहेर फेकले जायचे. अनैतिक संबंधातून पतीची हत्या करण्यात आल्याचं पोलीस तपासात उघड झालं आहे. मात्र या घटनेने परिसरात खळबळ माजली आहे. 

पोलिसांच्या माहितीनुसार, आरोपी पूनम आणि तिचा मुलगा दीपक या दोघांनी मिळून ही हत्या केली. आरोपी महिलेने तिचा पती अंजन दास यांना नशेच्या गोळ्या खायला दिल्या. त्यानंतर बेशुद्ध अवस्थेत मुलगा दीपकच्या मदतीने अंजन दासची हत्या करण्यात आली. अनैतिक संबंधावरून अंजन दासला संपवण्याचा कट रचण्यात आला होता. क्रूरता म्हणजे आरोपी पूनम आणि दीपक दोघेही घरातच अंजनच्या मृतदेहाचे तुकडे करून फ्रिजमध्ये लपवत होते असं समोर आले आहे. 

मृत अंजनच्या शरीराचे तुकडे एक एक करून पांडव नगर परिसरात फेकले गेले. दिल्ली पोलिसांनी सीसीटीव्ही फुटेजच्या मदतीनं या महिलेसह २ आरोपींना अटक केली. त्याचसोबत ज्या फ्रिजमध्ये मृतदेहाचे तुकडे ठेवले जायचे तोदेखील जप्त केला. सध्या पोलीस या घटनेचा सर्व अँगलने तपास करत आहेत. या घटनेने आसपासचे नागरिक दहशतीच्या सावटाखाली आहेत. पोलीस आरोपी पूनम आणि दीपकची कसून चौकशी करत आहेत. 

श्रद्धा वालकरच्या मृतदेहाचेही तुकडे
काही दिवसांपूर्वी मुंबईच्या श्रद्धा वालकर हिच्या हत्येचं रहस्य समोर आले. आफताबसोबत ती दिल्लीच्या महरौली भागात लिव्ह इनमध्ये राहत होती. आफताबनं १८ मे रोजी श्रद्धाची गळा दाबून हत्या केली. श्रद्धासोबत वाद झाल्यानं आफताबनं हे क्रूर कृत्य केले. आफताबने श्रद्धाच्या मृतदेहाचे ३५ तुकडे केले. ते घरातील फ्रिजमध्ये स्टोअर करून ठेवले होते. हे तुकडे रोज तो बाहेर नेत होता आणि वेगवेगळ्या ठिकाणी फेकत होता. 

या प्रकरणाचा खुलासा होताच पोलिसांनी आफताबला १२ नोव्हेंबरला अटक केली. पोलीस या प्रकरणाचा तपास करत असून अद्याप कुठलाही मोठा पुरावा त्यांच्या हाती लागला नाही. मात्र या घटनेमुळे देशभरात संतापाची लाट पसरली आहे. आफताबला फाशीची शिक्षा व्हावी अशी मागणी सर्वच स्तरातून होत आहे. श्रद्धाच्या मृतदेहाचे तुकडे आणि जवळपास ३ महिने तो फ्लॅटमध्ये राहत होता. इतके भयानक कृत्य करूनही आफताबला कुठलाही पश्चाताप नसल्याचं दिसून येत आहे. या प्रकरणानंतर आता दिल्लीतील पांडव नगर भागातील या घटनेने पोलिसांसमोर नवं आव्हान उभं केले आहे. 

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"