मालेगावात धारदार तलवारीने एकाचा खून, मागील भांडणाची कुरापत काढून मारहाण

गुन्हा दाखल : भांडणाची कुरापत काढून मारहाण

मालेगाव : मागील भांडणाची कुरापत काढून तलवारीने झालेल्या मारहाणीत एकाचा खून झाला असून, याप्रकरणी आझादनगर पोलिसांत संशयित आरोपी अफजल खान गुलशेर खान, कासीम (पूर्ण नाव माहीत नाही) असलम खान गुलशेर खान, जफर उल्ला खान अमन उल्ला खान ऊर्फ पहिलवान, वसीम भांजा (सर्व रा. मालेगाव) यांच्याविरोधात खुनाचा गुन्हा दाखल करण्यात आला आहे. सर्व संशयित आरोपी फरार झाले असून, पोलीस त्यांचा शोध घेत आहेत.

अब्दुल आहद मोहंमद इसाक ऊर्फ हमीद लेंडी (वय ३६), रा. सलीम मुन्शीनगर यांनी याप्रकरणी फिर्याद दिली. शनिवारी (दि.२३) रात्री दीड वाजेच्या सुमारास सलीम मुन्शीनगरात हा खून झाला. संशयित आरोपींनी गैरकायद्याची मंडळी जमवून हातात लाकडी दांडके घेऊन मोहंमद इब्राहिम समसुद्दोहा यासोबत झालेल्या मागील भांडणाच्या कारणावरून त्यास संशयित आरोपी अफजल व कासीफ याने तलवारीने आणि असलम याने लाकडी दांडक्याने मारून दुखापत केली. इब्राहिम यास सोडविण्यासाठी त्याचा लहान भाऊ अब्दुल अजीज समसुद्दोहा हा आला असता त्यालादेखील संशयित आरोपी नासीरने लाकडी दांडक्याने, तसेच जफा पहिलवान आणि वसीम भांजा या दोन संशयित आरोपींनी तलवारीने मारून गंभीर जखमी केले. मारहाणीत गंभीर जखमी झालेल्या मोहंमद इब्राहिम यास उपचारार्थ सामान्य रुग्णालय आणि तेथून खाजगी रुग्णालयात नेले असता डॉक्टरांनी तपासून त्यास मृत घोषित केले. अधिक तपास पोलीस निरीक्षक अशोक रत्नपारखी करत आहेत.