दोघांना लग्न करायचं होतं, पण घरचे तयार नव्हते; अखेर प्रेमी युगुलानं संपवलं आयुष्य

घटनास्थळी पोलिसांना सिंदूर आणि मिठाईचा बॉक्स सापडला. मृतदेह ताब्यात घेऊन पोस्टमोर्टमला पाठवला, श्वास गुदमरल्यामुळे दोघांचा मृत्यू झाल्याचे रिपोर्टमध्ये म्हटलं आहे.

मेरठ - उत्तर प्रदेशातील मेरठ इथं एका प्रेमी युगुलानं गळफास घेत आत्महत्या केली आहे. या प्रियकरानं आधी प्रेयसीच्या कपाळावर सिंदूर लावले मग मिठाई खायला दिली. त्यानंतर एका रस्सीनेच गळफास घेत आत्महत्या केली. या दोघांच्या नात्याला घरच्यांनी नकार दिला होता असं पोलिसांनी सांगितले. या घटनेची माहिती मिळताच पोलीस घटनास्थळी पोहचले त्याठिकाणी मृतदेह ताब्यात घेऊन पोस्टमोर्टमला पाठवले. सध्या संपूर्ण प्रकरणाचा तपास सुरू आहे. 

मिळालेल्या माहितीनुसार, २१ वर्षीय राखी आणि उत्तराखंडच्या हरिद्वार येथे राहणाऱ्या २४ वर्षीय मनिषचा मृतदेह एका झाडाला लटकलेल्या अवस्थेत सापडला. त्यानंतर प्राथमिक तपासात राखी-मनिष एकमेकांवर प्रेम करत होते. त्या दोघांना लग्न करायचे होते. परंतु घरच्यांनी दोघांच्या नात्याला नकार दिला. गेल्या काही दिवसांपासून राखी-मनिष तणावात होते. रविवारी रात्री मनिष आणि राखी भेटले. त्यावेळी मनिषने राखीच्या कपाळावर सिंदूर लावले. दोघांनी मिठाई खाल्ली आणि त्यानंतर टोकाचे पाऊल उचलले. दोघेही एकाच रस्सीच्या सहाय्याने एकमेकांना पकडून गळफास घेतला. घटनेची माहिती मिळताच तात्काळ पोलीस घटनास्थळी पोहचले. 

तसेच घटनास्थळी पोलिसांना सिंदूर आणि मिठाईचा बॉक्स सापडला. मृतदेह ताब्यात घेऊन पोस्टमोर्टमला पाठवला, श्वास गुदमरल्यामुळे दोघांचा मृत्यू झाल्याचे रिपोर्टमध्ये म्हटलं आहे. दोघांचा मृत्यू एकाचवेळी झाला. युवक आणि युवतीच्या मृतदेहांवर नातेवाईकांकडून अंत्यसंस्कार करण्यात आले आहे. 

दरम्यान, याचप्रकारच्या एका घटनेत एका २० वर्षीय युवतीने प्रियकरासोबत कालव्यात उडी घेऊन जीव देण्याचा प्रयत्न केला. मुलीला स्थानिक लोकांनी वाचवले तर अद्याप युवकाचा शोध लागला नाही. मुलीची अवस्था गंभीर आहे. त्यामुळेच अद्याप तिचा जबाब नोंदवला नाही. दोघेही एकमेकांवर प्रेम करत होते.या प्रकरणातही घरच्यांनी दोघांच्या नात्याला नकार दिला म्हणून आत्महत्या करण्याचा प्रयत्न केला आहे.