पतीला वश करण्यासाठी पत्नीने ज्योतिषाला दिले ५९ लाख; प्रियकरानेही दिली साथ, मग...

या कामात महिलेचा एक्स बॉयफ्रेंड परेश याने ज्योतिष बादलला मदत केल्याचं पोलीस अधिकाऱ्यांनी सांगितले

मुंबई - शहरात एक धक्कादायक घटना समोर आली आहे. एका महिलेने आपल्या व्यावसायिक पतीला वश करण्यासाठी ज्योतिषाला ५९ लाख रुपये दिले, ही घटना पवई भागातील आहे. पोलिसांनी महिलेचा प्रियकर परेश गडा, ज्योतिषी बादल शर्मा यांच्याविरुद्ध फसवणुकीचा आणि पैसे लाटल्याचा गुन्हा दाखल केला आहे. मिळालेल्या माहितीनुसार, ज्योतिषी आणि महिलेच्या बॉयफ्रेंडनं मिळून काळ्या जादूच्या नावाखाली पतीला वश करण्याचं आमिष दाखवत व्यावसायिकाच्या पत्नीकडून २४ लाख रुपयांचे सोने आणि ३५ लाख रुपयांची रोकड नेली.

सोशल मीडियाच्या माध्यमातून मी ज्योतिष बादल शर्माला भेटली होती असं ३८ वर्षीय महिलेने पोलिसांना सांगितले. ही घटना १३ ते १८ ऑक्टोबर दरम्यान घडली. या दोघांनाही लवकरच अटक करण्याचा दावा पोलीस करत आहेत. महिलेच्या पतीने आपल्या तक्रारीत पोलिसांना सांगितले की, दिवाळीच्या दिवशी कर्मचाऱ्यांना पगार देण्यासाठी त्याने हे पैसे घरी ठेवले होते. पगार देण्याची वेळ आली तेव्हा कपाट उघडले असता त्यात ३५ लाख रुपये नव्हते.

या कामात महिलेचा एक्स बॉयफ्रेंड परेश याने ज्योतिष बादलला मदत केल्याचं पोलीस अधिकाऱ्यांनी सांगितले. १३ वर्षांपूर्वी जेव्हा व्यावसायिकाला पत्नीच्या अफेअरची माहिती मिळाली, तेव्हापासून दोघांमध्ये भांडण सुरू होते. यामुळे व्यथित झालेल्या व्यावसायिकाच्या पत्नीला त्याला वश करायचे होते. महिलेने पोलिसांना सांगितले की, ज्योतिष बादलने पतीला वश करण्यासाठी काळी जादू करणार असल्याचे सांगितले होते. कारण तिचा नवरा फक्त त्याच्या भावाचे आणि कुटुंबीयांचेच ऐकत असे.

या व्यावसायिकाचे म्हणणं आहे की, जेव्हा त्याने आपल्या पत्नीला या प्रकरणाबद्दल विचारलं तेव्हा तिने काहीही सांगितले नाही. बऱ्याच प्रयत्नांनंतर पती आणि दिराने विश्वासात घेऊन विचारणा केली असता सगळा प्रकार समोर आला. ते ऐकून पतीला धक्काच बसला. त्यानंतर लगेच पोलीस ठाण्यात तक्रार दाखल करण्यात आली. पोलीस आरोपीचा शोध घेत आहेत.

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"