विवाहबाह्य संबंधातून पतीच्या हत्येची मांत्रिकाला सुपारी; मुलीच्या हॉकी शिक्षकावरच जडला जीव

पत्नीच्या स्वभावात झालेल्या बदलामुळे पतीने घरात रेकॉर्डर लावले होते. त्यामध्ये पती घराबाहेर गेल्यावर पत्नी त्या शिक्षकासोबत बोलत असल्याचे उघड झाले.

नवी मुंबई : मुलीच्या शिक्षकावरच जीव जडल्याने पतीला मार्गातून हटवण्यासाठी मांत्रिकामार्फत हत्येचा कट रहचल्याची घटना समोर आली आहे. पतीने घरात रेकॉर्डर लावून पत्नीचा हा कट उघड केला आहे. याप्रकरणी पतीच्या तक्रारीवरून पत्नी व मांत्रिक विरोधात रबाळे पोलिस ठाण्यात गुन्हा दाखल करण्यात आला आहे.

घणसोली परिसरात राहणाऱ्या व्यक्तीसोबत हा प्रकार घडला आहे. त्यांची मुलगी वाशीतील एका शाळेत शिकत असून तिथे तिला हॉकी शिकवले जात असल्याने हॉकी शिक्षकाने पालकांचा व्हाट्सअप ग्रुप बनवला आहे. त्यामध्ये या व्यक्तीच्या पत्नीची त्या हॉकी शिक्षकासोबत घनिष्ट मैत्री होऊन त्यांच्यात प्रेमसंबंध सुरु होते.

दरम्यान पत्नीच्या स्वभावात झालेल्या बदलामुळे पतीने घरात रेकॉर्डर लावले होते. त्यामध्ये पती घराबाहेर गेल्यावर पत्नी त्या शिक्षकासोबत बोलत असल्याचे उघड झाले. यामुळे पतीने पत्नीवर पाळत ठेवली असता ते दोघे कोपर खैरणेत व वाशीत एकमेकांना भेटत असल्याचेही समोर आले. यामुळे दोघांमध्ये खटके उडत असतानाच पत्नीने आपल्या हत्येची सुपारी दिली असल्याचे उघड झाले.

सदर महिला अकोला येथील एका मांत्रिकाला फोन करून पतीचे निधन व्हावे, त्याची संपत्ती आपल्याला मिळावी तसेच हॉकी शिक्षकासोबत आपले लग्न व्हावे यासाठी मंत्रोपचार घेत असल्याचे उघड झाले. यासाठी ती प्रत्यक्ष अकोला येथील गणेशपुरी महाराज या मांत्रिकाला भेटून त्याच्याकडून आणलेली पावडर आपल्याला अन्नातून दिल्याने आपली प्रकृती बिघडून काही दिवस रुग्णालयात दाखल व्हावे लागले असल्याचेही पतीचे म्हणणे आहे. शिवाय पत्नीने सासरी जाऊन आपल्या कुटुंबियांच्या निधनाची देखील जादूटोण्याचा आधार घेतल्याची तक्रार पोलिसांकडे केली आहे. त्यानुसार महारष्ट्र नरबळी आणि अघोरी प्रथा, जादूटोणा प्रतिबंध कायद्यांतर्गत रबाळे पोलिस ठाण्यात पत्नी व मांत्रिक यांच्यावर गुन्हा दाखल करण्यात आला आहे. दरम्यान पत्नीला नोटीस बजावण्यात आली असून याप्रकरणी अधिक तपास सुरु असल्याचे वरिष्ठ पोलिस निरीक्षक राजेंद्र कोते यांनी सांगितले.