प्रियकराचे तुकडे केले अन् मैत्रिणीच्या घरात...; महिलेचा कांड, ३ राज्यातील पोलीस हैराण

उत्तर प्रदेशात प्रियकरापासून सुटका करण्यासाठी पती आणि पत्नीनं रचला प्लॅन, ३ राज्यातील पोलिसांच्या मदतीने आरोपींना अटक 

प्रतापगड - उत्तर प्रदेशातील प्रतापगड येथे महिलेनं असा कांड केला ज्यामुळे ३ राज्यातील पोलीस हैराण झाली आहे. या महिलेनं तिच्या पतीसोबत मिळून प्रियकराची हत्या केली आहे. त्यानंतर त्याचा मृतदेह मैत्रिणीच्या घरी दफन केला. हा मृत बिहारचा राहणारा होता. जेव्हा अनेक दिवसांपासून तो बेपत्ता होता तेव्हा घरच्यांना बिहार पोलिसांकडे याची तक्रार केली. पोलिसांनी बेपत्ता व्यक्तीचा शोध घेण्यास सुरूवात केली तेव्हा काळीज हादरवणारं हत्याकांड उघडकीस आलं. 

यूपीतील सुवंसा गावातील ही घटना आहे. याठिकाणी राहणाऱ्या विनोद आणि त्याची पत्नी पुष्पा हे हरियाणातील गुरुग्राम येथे खासगी कंपनीत काम करतात. तिथेच पुष्पाचं बिहारच्या शिवनाथसोबत अफेअर सुरू झालं. मात्र पुष्पा काही काळातच शिवनाथला वैतागली. त्याच्यापासून तिला सुटका हवी होती. परंतु शिवनाथ नातं तोडायला तयार नव्हता. ही कहाणी महिलेने तिच्या पतीला सांगितली. त्यानंतर या जोडप्याने एक प्लॅन बनवला. 

एक महिन्याआधी पुष्पा कंपनीतून सुट्टी घेत सुवंसा गावात तिच्या घरी आली. तिने प्रियकर शिवनाथलाही तिथे बोलावले. प्रेयसीच्या बोलण्याने शिवनाथही सुट्टी घेऊन तिला भेटायला पोहचला. परंतु त्याच्यासोबत पुढे काय घडणार आहे याची थोडीशीही कल्पना त्याला नव्हती. पुष्पाने शिवनाथला भेटवण्यासाठी तिची मैत्रिण पूनमलाही घरी बोलावले. तेव्हा घरी पुष्पाचा पती, पूनम आणि तिचा पती चिंतामणीही हजर होता. शिवनाथ जसा आला तसा या सर्वांनी मिळून त्याचा गळा दाबून हत्या केली.

हत्येनंतर शिवनाथच्या मृतदेहाचे ३ तुकडे केले. पूनमच्या घरातच शिवनाथचा मृतदेह दफन केला. त्यानंतर विनोद आणि पुष्पा गुरुग्रामला परतले. दुसरीकडे बिहार पोलीस शिवनाथचा शोध घेत होती. तेव्हा तो पुष्पा नावाच्या महिलेसोबत सतत संपर्कात होता असं समोर आले. शिवनाथचं शेवटचं बोलणं तिच्याशीच झालं होतं. त्यानंतर पोलिसांनी पुष्पाला ताब्यात घेत चौकशी केली. खाकीचा धाक दाखवताच तिचा संयम तुटला आणि तिने सर्व कहाणी पोलिसांना सांगितली.

२ आरोपी फरार

पोलिसांनी प्रतापगड येथील पुष्पाची मैत्रिण पूनमच्या घरातून शिवनाथचा मृतदेह बाहेर काढला. त्यानंतर तो पोस्टमोर्टमला पाठवला. शिवनाथच्या घरच्यांना त्याच्या मृत्यूची बातमी दिली. त्यासोबत विनोद आणि पुष्पाला पोलिसांनी अटक केली. मात्र पूनम आणि तिचा पती चिंतामणी हे दोघे फरार असून पोलीस त्यांचा शोध घेत आहे. या प्रकरणाचा आणखी तपास सुरू आहे.