पत्नीचे बाहेरील व्यक्तीशी होते अनैतिक संबंध; नवरा ठरत होता अडसर, पुढे भलतच घडलं!

अनेक दिवसांपासून त्याला दारूचे व्यसन हाेते. यावरून पती-पत्नी यांच्यामध्ये दररोज भांडण होत असत.

सांगली: खरसुंडी (ता. आटपाडी) येथे अनैतिक संबंधास अडसर ठरणाऱ्या पतीचा निर्घृण खून करून आत्महत्येचा बनाव रचण्याचा धक्कादायक प्रकार समाेर आला आहे. सतीश उत्तम धुमाळ (वय ३१) असे मृत पतीचे नाव असून, याप्रकरणी त्याची पत्नी चंदा, मेहुणा चेतन बलभीम वाडेकर, साडू अतुल पवार, मेहुणी मोनिका पवार (सर्व रा. खरसुंडी) यांच्याविराेधात गुन्हा दाखल करण्यात आला आहे. ही घटना सोमवारी रात्री उशिरा घडली. याप्रकरणी या चाैघाही संशयितांना अटक करण्यात आली आहे.

मृत सतीश धुमाळ याचे मूळ गाव म्हसवड (ता. माण, जि. सातारा) आहे. गेल्या दहा वर्षांपासून ताे पत्नीसह खरसुंडी येथे सासुरवाडीत नातेवाइकांच्या घरी भाड्याने राहत होता. आचारी काम, रंगकाम यासह पडेल ती कामे करून ताे उदरनिर्वाह करीत असे. चार दिवसांपूर्वी तो पत्नीसह जवळच असलेल्या अन्य एका नातेवाइकाच्या घरी भाड्याने राहण्यास गेला होता.

अनेक दिवसांपासून त्याला दारूचे व्यसन हाेते. यावरून पती-पत्नी यांच्यामध्ये दररोज भांडण होत असत. दरम्यान, चंदा हिचे बाहेरील व्यक्तीशी अनैतिक संबंध हाेते. त्यास सतीश अडसर ठरत हाेता. यामुळेच चंदा हिच्यासह चेतन वाडेकर, अतुल पवार, माेनिका पवार यांनी डाेक्यावर व चेहऱ्यावर धारदार शस्त्राने वार करून खून केला, असे सतीश याचा भाचा अनुराज पवार (रा. म्हसवड) यांनी आटपाडी पाेलीस ठाण्यात दिलेल्या तक्रारीत म्हटले आहे.

माझ्यासोबत संबंध ठेव, अन्यथा तुझे आंघोळ करतानाचे व्हिडिओ व्हायरल करेल; सासऱ्याची धमकी https://t.co/CBwxYMKLzj

— Lokmat (@lokmat) December 28, 2021

दरम्यान, घटनेची माहिती मिळताच आटपाडी पाेलिसांनी घटनास्थळी धाव घेतली. यावेळी सतीश मृतावस्थेत आढळून आला. त्याच्या घरासमाेर रक्ताचे डाग पडले होते. तसेच खिडकीला साडीने गळफास घेण्याचा प्रयत्न केल्याचा बनाव रचण्यात आल्याचे दिसून आले. पोलिसांनी घटनास्थळी पंचनामा करून चाैघा संशयितांना अटक केली. याप्रकरणी अधिक तपास सुरू असल्याचे अधिकाऱ्यांनी सांगितले.