प्रेयसीला खुश करण्यासाठी कारची चोरी, पण पहिल्याच राइडमध्ये...

kanpur boyfriend stole car for ride with girlfriend arrested : प्रेयसीने कारमधून फिरण्याची इच्छा व्यक्त केली असता प्रियकराने चक्क कारची चोरी केली.

कानपूर : आपल्या प्रेयसीला खुश करण्यासाठी उचललेले पाऊल प्रियकराला चांगलेच महागात पडले. या प्रेयसीने कारमधून फिरण्याची इच्छा व्यक्त केली असता प्रियकराने चक्क कारची चोरी केली. मात्र, प्रेयसीसोबत पहिल्याच राइडमध्ये त्याची चोरी पकडली गेली. पोलिसांनी प्रियकर आणि त्याच्या एका मित्राला अटक करून तुरुंगात पाठवले. उत्तर प्रदेशातील कानपूर शहरातील ही घटना आहे. (kanpur boyfriend stole car for ride with girlfriend arrested)

दरम्यान, राहुल असे या प्रियकराचे नाव आहे. त्याने आपल्या प्रेयसीला कारमधून फिरवण्यासाठी फतेहपूर येथून कारची चोरी केली. मात्र, त्याने कारचा नंबर बदलला नाही. दुसरीकडे फतेहपूरमध्ये कार मालकाने पोलिसांना कारची चोरी झाल्याचे कळवले. राहुल ज्यावेळी त्याची प्रेयसी आणि एका मित्रासह चाकेरी महामार्गावरून जात होता, त्यावेळी कारचा नंबर पाहून पोलिसांनी त्याला पकडले. यावेळी कारमध्ये राहुलची प्रेयसी आणि त्याचा एक मित्र होता.

पोलिसांनी दिलेल्या माहितीनुसार, राहुलने त्याचा मित्र फिरोजसोबत फतेहपूर येथून स्विफ्ट कारची चोरी केली. कारचे मालक रामस्वरूप यांनी फतेहपूरमध्ये गुन्हा दाखल केला. यावेळी फतेहपूर पोलिसांनी कानपूर पोलिसांना माहिती दिली. ज्यावेळी राहुल हा फिरोज आणि त्याच्या प्रेयसीसोबत कारमधून जात होता, त्यावेळी पोलिसांनी कारचा नंबर पाहून थांबविली आणि त्यांना पकडले. 

तपासादरम्यान, राहुल आणि फिरोज हे गाझीपूरचे रहिवासी असल्याची माहिती मिळाली आहे. राहुलने त्याच्या प्रेयसीला कारमधून फिरवण्यासाठी चोरी केल्याचे सांगितले. दुसरीकडे, राहुलच्या प्रेयसीला कार चोरीची असल्याचे माहित नव्हते. तिने पोलिसांना सांगितले की, राहुलने चोरीची कार आणली होती, हे मला माहित नव्हते. दरम्यान, पोलिसांनी चौकशी केल्यानंतर मुलीची सुटका केली. मात्र, दोन्ही आरोपींना तुरुंगात पाठवण्यात आले.