भयंकर! सिगारेटनं चेहरा जाळला, खिळ्यानं डोळे काढले; १० वर्षीय मुलाची निर्घृण हत्या

१० वर्षीय मुलाची निर्घृण हत्या; मृतदेह पाहून पोलिसांचा थरकाप उडाला

विवस्त्र शरीर, सिगारेटनं चटके दिल्याचे डाग, खिळ्याच्या मदतीनं काढण्यात आलेले डोळे, गळ्याजवळ बुटाचे डाग.. कानपूरमध्ये १० वर्षाच्या मुलाचा मृतदेह आढळून आल्यानं खळबळ माजली आहे. मुलासोबत करण्यात आलेलं दुष्कृत्य पाहून पोलीस कर्मचारीदेखील हादरले. मुलाचा मृतदेह पाहून स्थानिकांचा थरकाप उडाला.

१० वर्षांचा मुलगा दोन दिवसांपूर्वी बेपत्ता झाला होता. त्याचा मृतदेह मंगळवारी सापडला. मुलाची हत्या करणाऱ्यांनी त्यांचे अतिशय हाल केल्याचं मृतदेहाची अवस्था पाहून पोलिसांच्या लक्षात आलं. त्याच्या डोळ्याजवळ एक खिळा सापडला. त्याच खिळ्याचा वापर करून मुलाचा डोळा काढण्यात आल्याचा संशय पोलिसांना आहे. मुलाच्या मानेजवळ बुटांचे डाग आढळून आले. मुलाला बुटानं चिरडण्याचा प्रयत्न झाल्याची शक्यता पोलिसांनी बोलून दाखवली.

मुलाच्या मृतदेहाजवळ दोन ग्लास आणि दारूची बाटली आढळून आली. त्यामुळे आरोप दोन असावेत असा संशय पोलिसांना आहे. दारू पिऊन त्यांनी मुलाला निर्घृणपणे मारलं असावं असं पोलिसांनी सांगितलं. मुलाच्या चेहऱ्यावर सिगारेटचे डाग आहेत. हत्या करण्यात आल्यानंतर मुलाचा मृतदेह फरफटत नेण्यात आला. तशा खुणा घटनास्थळी दिसून आल्या आहेत. मृतदेहाच्या मागचा भाग काळा पडलेला आहे.

आरोपींनी खून करताना केलेला निर्घृणपणा पाहता त्यांच्या मनात मुलाबद्दल किती संताप, द्वेष होता ते दिसतं, असं कानपूर आऊटरचे एसपी अजित कुमार सिन्हा यांनी सांगितलं. आरोपींचा मुलावर इतका राग का होता, ते त्यांच्या अटकेनंतरच समजू शकेल. मुलाच्या मृतदेहाची अवस्था पाहून माझाही थरकाप उडाला, अंगावर काटा आला, असं सिन्हा म्हणाले. आरोपींचा शोध सुरू असून या प्रकरणात बेजबाबदारपणा दाखवणाऱ्या अधिकाऱ्यांवर कारवाई करण्यात येईल, अशी माहिती त्यांनी दिली.