गाडी हळू चालवायला सांगितली, संतापलेल्या तरुणाने 5 जणांना उडवलं

आरोपी तरुणाने भरधाव वेगाने गाडी वरातीत घुसवली, यात दोघांचा जागीच मृत्यू झाला

कर्नाल: हरियाणाच्या कर्नाल जिल्ह्यात रविवारी एक मोठा अपघात घडला, यात एका महिलेसह दोघांचा मृत्यू झाला तर काहीजण जखमी झाले आहेत. मिळालेल्या माहितीनुसार, रस्ताने लग्नाची वरात जात होती. यावेळी वरातीमधील काही लोकांनी आरोपी तरुणाला गाडी सावकाश चालवण्यास सांगितले, या गोष्टीचा राग आलेल्या तरुणाने भरधाव गाडी वरातीत घुसवली, ज्यात दोघांचा मृत्यू झाला.

पोलिसांकडून मिळालेल्या माहितीनुसार, कर्नालच्या नीलोखेडीमधील एका कॉलनीत लग्न सुरू होतं. यावेळी कॉलनीतील अजय नावाच्या तरुणाला वरातीमधील काही जणांना गाडी सावकाश चालवण्यास सांगितली. या गोष्टीचा राग आल्याने अजयने वेगाने गाडी वरातीत घुसवली. यादरम्यान त्याने पाच जणांना उडवलं. 

या धक्कादायक घटनेत एकाचा जागीच मृत्यू झाला, तर दुसऱ्याचा रुग्णालयात उपचारादरम्यान मृत्यू झाला. तसेच, इतर तिघे गंभीर जखमी झाले. याप्रकरणी पोलिसांनी मुख्य आरोपी अजय आणि त्याच्या वडिलांविरोधात खुनाचा गुन्हा दाखल केला आहे. सध्या आरोपी फरार असून, पोलिसांनी आरोपींना पकडण्यासाठी पाच पथकं तयार केली आहेत.